Dei ban khang lad ban die ia jaka ki Raid, ong Bah Antonio

Shillong, 27 Jylliew:
U MDC ka Laitum khrah Bah Antonio War u la ban ba ka KHADC ka dei ban thaw ia ki kyndon ba pyrkhing ban khang lad ia ka jingdie ia ki jaka Raid sha ka sorkar ban tei ia ka sor thymmai New Shillong Township (NST).
“Ka long kaba sngew sih ba ka la don ka jing pyrshang ban die duh ia ki jaka Raid jong ki paidbah”, la ong u Bah War ha kane ka sngi Palei haba iashim bynta ha ka jingiakren ia ka dorbar mang tyngka ka KHADC.
Katkum ka jingong u MDC ka Laitumkhrah, ka jingdie beain ia ki jaka Raid ka la pynlong ia ki paidbah ban phet shnong kiba sah ha kum kitei ki jaka la bun phew snem.
“Bun bah ki nongshong shnong kiba sha ha ki shnong kiba hap ha ka NST kiba shaniah ha ka rep ka riang ki la shah ktah na kane ka jingdie ia ki jaka”, la ong u Bah War.
“Bun ki shnong kum ka Mawlong bad Umsawli ki la rit bad shen ki nongrep kin hap ban phet shnong namar ba kim don jaka shuh ban rep ban kyrshan ia ka jingim jongki”, la ong u MDC ka Laitumkhrah.
Kaba sngewsih ka long ba ki briew kiba nabar ki wan ban buhai shnong ha ka sor thymmai.
“Kumba long mynta, ka jingthaw ia ka sor thymmai kam shym la iarap eiei ia ki trai shnong hynrei ka plie lad pynban ia ki nongwei,”, la ong u Bah War.