Dei ban ker sainar shiah na u zero line, dawa ka CCIB

Shillong:Ka Co-ordination Committee on international border (CCIB) ha ka sngi ba ar jong ka taiew, ka la pynshai ba ka jing ker sainar shiah ha ki khappud Meghalaya Bangladesh kan dei beit naduh zero line bad ka kynhun ka la pynshai ruh ba kam don satia kata ka jing pyrshah ia ka jing ker sainar shiah, ba la thmu da ka sorkar.

Haba iakren bad ki nongthoh khubor u Chairman jong ka CCIB, u bah Sukkynjai Marchiang, u la iathuh ba ha ka 03 tarik Nohprah, ki ophisar na ka liang jong ka sorkar ki la wan hiar sha ka jaka ba la tip kum ka shnong Rhongkhong kaba hap ha Amlarem civil subdivision jong ka West jaiñtia hill district, ban sdang noh ia ka jingker sainar na katei ka jaka, wat la ka don ka jing pyrshah ba jur, na ka liang jong ki trai jaka.
U la ong ruh ba ha ka 05 tarik Nohprah 2022, ki kynhun seng bhalang jong ka jylla kiba kynthup naduh ka Federation of Khasi Jaiñtia and Garo people (FKJGP), ka Khasi Students Union (KSU) lem bad ka Hynñiewtrep national youth front (HNYF) ki la hiar sha katei ka jaka ban pynsangeh noh ia ka jingker sainar, kaba ki la ker naduh ka jingjngai ba 150 phut naduh u mawpud jong ka India bad Bangladesh.

Haba ki dkhot jong ki kynhun seng bhalang ki leit sha katei ka jaka, ki dap da ka jing sngew lyngngoh ban ioh sngew ba ki ophisar ki la ong ba ki la dep ioh ia ka jingbit na ki trai jaka, hadien ba ki la dep siew ia ka pisa bai jaka sha u trai jong katei ka jaka u bah Wanshalan Dhar, la ong u bah Myrchiang.
U Chairman jong ka CCIB, u la iathuh ruh ba ka kynhun ka jong ki, ka dei ka komiti ba kynthup ia ki trai jaka ha ki khappud bad ki kynhun seng bhalang, kiba la mynjur ruh ba kin ym ailad satia lada ka jingker sainar shiah hi kan dei ha ka jing jngai ba 150 phut na u mawpud, namar kin duh bun bha ki jaka kiba ki juh pyndon kam ban rep ban riang baroh shi katta.

Ka kynhun ka la kynnoh ruh ba u Wanshalan Dhar u la thok ia ka CCIB, katba ka sorkar pat ka la thom da ka bor ban pynieng ia ki kper sainar shiah ha kitei ki bynta, wat la ka jing mynjur na ki trai jaka kim shym la ioh satia.