Josper S Dura
Ko khun ka ri, Khasi bad Pnar,
Ka pyrthei khmih ka nang kham iar;
- Soso Tham.
Ha ka section 2 jong ka jinglaitluid Khasi Jaintia Hills Autonomous District (Appointment and succession of Chiefs and Headman) Act, 1959 la batai ba “Headman” ka mut u Myntri, u Syiem Raid, u Basan, u Lyngdoh Raid, u Matabor, u Elector, u Pator, u Sangot, u Tymmen shnong, u Sordar shnong, u Sordar Raid bad u Rangbah shnong. Ngin shu klum lang noh ia kine baroh hapoh ki kyntien. ‘KI KHLIEH NONGSYNSHAR SHNONG’.
Kum ka jaidbynriew (Khasi Pnar) ngi la im ha ka juk ba ym lah ban kiar na ki jingkylla; na kaba rim sha kaba thymmai bad kaba pyn myntoi (modernise) ha kiba bun ki liang. Lah ban ong ba kumba shispah snem mynshuwa, niar eh ban don ki nongpule ha ki skul khamtam ha ki nongkyndong jong ngi. Wat ha ki jaka sor ruh, kiba la pass tang ia ka minor (klas six) ha kata ka por ki long kiba la bit ban bat ia ka kam majistor (majistrate) bad ia kiwei kiwei ki kam sorkar kiba heh. Kumta ngi lah ban sngewthuh ba ki Dorar shnong ki hap ban jied ia la ki jong ki jong ki khlieh nongsynshar shnong tang ia ki riew rangbah kiba don ka jinglong kaba bha bad kaba donburom. Bad ha kato ka por ka biang hi ia kiei kiei baroh ha ka imlang sahlang bad ha ki kam iap kam im.
Hynrei ha kane ka juk jong ngi mynta, ki briew ba la nang la stad ha ka thoh ka pule ki la bun ha ki jaka sor bad ha ki nongkyndong ruh. Nangta ruh ka por hi ka la kylla na kaba rim sha kaba thymmai ka juk jong ki longshuwa jong ngi, haba shu kren kyllum, ka dei ka juk jong ka RTI bad LTI.
Ha ka jingtyllun jong ka por, ha ka rukom synshar khaddar, kaba rim kam lah shan bad ieng pyrshah shuh ia ka bor jong ka mynta (modernism). Kane ka juk jong ngi kaba mynta ka dei ka juk jong ki kot, u khulom, ki Forms, bad ka science bad Technology. Ka dei beit ka juk jong ki computer. Kumta ka por ka la dei bad biang eh ba ka Khasi Hills Autonomous District Council (KHADC) bad ka Jaintia Hills Autonomous District Council (JHADC) kumba la pynkup bor da ka Sixth Schedule ba kin thaw noh da ka ain kaba buh (prescribe) da ka kyrdan pule ia kito kiba kwah ban trei ia ka kam khlieh nongsynshar shnong. Khlem artatien ka jingkylli kan mih na ki paidbah – Balei pat ba ia ki MDC, MLA bad MP ka sorkar kam shym la buh ia ka kyrdan pule jong ki?
Ka jubab ia katei ka jingkylli ka dei kane – ki District Council ki don la ki niongtrei ba la pyntbit bha ban trei ia ki kam jong ki. Kumjuh ruh, ka sorkar Meghalaya bad ka sorkar India ki don la ki jong ki jong ki nongtrei ba la pyntbit bha ban trei ia ki kam jong ki. Ki don ia kata kaba ki khot ka “Bureaucracy” (ka rukom jingsynshar da ki nongtrei sorkar) bad dei kane ka sorkar (real executive). U Chief Minister bad ki Minister, u Prime Minister bad ki Minister, ki shaniah ha ka “Bureaucracy” ban iaid beit bad iaid ryntih ki kam ka sorkar. Ma ki pat ki shu kren, pynshai bad batai ha la ki jong ki jong ki iing dorbar ia ki jnit ki jnat jong ki kam kumba ki la ioh jingtip na ki nongtrei sorkar (Officials).
Ki khlieh nongsynshar shnong jong ngi pat kim don ia kita ki nongtrei (Officials) kumba don ki District Council, ki sorkar Jylla bad ka sorkar India. Ki don tang u Chairman, u Secretary, U Treasurer, bad u Sangot kum ki nongkitkam, lem bad ki dkhot ki Committee bad dorbar shnong. Ha kane ka juk kaba mynta, u khlieh nongsynshar shnong bad wat u Chairman, u Secretary bad u Treasurer kin shem jingeh shibun ban synshar shnong lymda ki dei kiba la nang la stad bad don ki kyrdan pule. Laiphew pura snem mynshuwa, uwei u Minister Meghalaya u la wan jingoh ia ka shnong jong ngi. Ha ki jingiakren ha ka por dihsha, u ong ia nga – phi ki khlieh nongsynshar shnong phi shitom shisha ha ki jingtrei kam jong phi. Ngi ki Minister te ngi kham suk namar ngi don ka “machinery” (ka kynhun ki nongtrei naduh kjat haduh khlieh).
Ki District Council kim dei ban ailad ia ka dorbar shnong, dorbar Raid ne Dorbar Ilaka, ba kan ia kren ne batai halor katei ka phang (agenda) buh kyrdan pule ia ki khlieh nongsynshar shnong. Lada ka long da kata ka lynti, la wai artad ka pyrthei. Kin don ki group bym don kyrdan pule ki ban pynkulmar bad pynbira ia ka kam namar kin don byllai na ki kiba kwah ia ka kam khlieh nongsynshar shnong. Ki District Council ki dei ban shim ha lade kum ba la thoh ha shuwa, ia kane ka kam thaw ain ban buh noh da ka kyrdan pule ia ki khlieh nongsynshar shnong. Kiba pyrshah ki mat leit mudui sha High Court, hynrei artatien ba kin jop.
Ha ka jingsngewthuh shimet jong une u nongthoh, ka kyrdan pule kaba rit eh (minimum educational qualification) jong u khlieh nongsynshar shnong ka dei ban long ka SSLC passed ne ka Matriculation.
Kata ruh ka dei hi ba ki nong synshar shnong kin don kyrdan. Hynrei bun pat ba ki ba nang ba stad ki mushlia than pat bad ruh kiba nang ba stad ki im ka jingim greedy kham tam lada ki iohi iaka pisa. Hato ym kham suk pynban tang kito ki ba pass tang klas vi bad ki bat iaka hok ka shi kyntien ban iakiba nang ba stad.
Ka long ka ba bha tam ia ki khlieh nongshynshar shnong ban ioh ia ka kyrdan SSLC ne 10 passed. Namar ki bymdon kyrdan kim da nang bha ban pyrkhat ia ka jingeh kumno ban leh, ne kumno ban twat lynti khnang ban lait na ka jingeh. Ka main rangbah ruh ha ki ka duna bha namar ba kim don ia ka kyrdan pule puthi. Wat ia ka ain shnong ruh kim da nangbha ban thaw kyndon khnang ban long kiba shongsuk ka shnong ka thaw. Kane kam dei ba ngi pynrem ia ki, hynrei tang na ka daw ka juk ka por ba mynta ka long ka juk thoh juk pule.Tang kane, Khublei shibun ia phi ki paralok.
Kat kum ka jing iaid ka por,, nga ai ka jing kyrshan ba Pura ia Kane ka ain.
Lada ioh jing siew te ka dei hok kein ban buh kyndon kumta, mynta haba ki lah pynlut pisa na kabynta ki jong pule na ei pat kin ioh lada kin bat kam Shnong, bad lada ki ioh ruh shah kynnoh bam sap….ia ka kam shnong hi te dei ban trei mon sngewbha lada dei uba rit ne ba heh kyrdan. Yn ia buh kyrdan sngew kumba ngin lah ban pynbiang ia ki
Kane ka jingai jingmut ka long kaba bha tam lada u paidbah ka bri u hynniew trep u shim khia lang iakane ka mat kum kaba kongsan bad kaba hakhmat tam.Namar hakane ka juk ba mynta ka lah dei ka juk thymmai lane (modernism) baki ong haka ktien nongwei .
Ka jingpyrkhat ban leh iakaei kaei kaba kham bha bad kaba thymmai kan long shibun bah ka jingkyrkhu iaka Ri bad Jaitbynriew.
Hakane ka juk ba mynta ha u ba bun balang lada ngin buh jingkylli kawei : Hato phi bud bad beh ne em iaka “JINGKYLLA”. Baroh un jubad ‘ haoid/yes’. Kaba mut ; kumka nuksa , mynshwa ngi pyndonkam da u (1)khulom Nip/sia—-hadien pat da u ball point pen.(2) type writter—- hadien pat daka computer. Kane kaba mut , ngi beh naka por sha ka por iaka development, Khnang ban pynbha bad pynstep iaki kam ki jam jong ngi.
Mynta ngin phai pat sha ka phang(agenda)haka baiadei bad ki kam Shnong kam thaw, kam Hima sima . Naka liang jong nga ruh nga buh kane ka jingkyrpad iaka Office jong ka District Council, ba kan buh iaka kyrdan pule haba jied Rangbah Shnong/Syiem Raid/Sordar Raid/ Syiem Hima bad baroh kiwei kiwei kiba dei ki Khlieh Nong Shynshar , kiba hap hapoh ka jingpeit jingkhmieh jong ka .
Khublei shibun.
Hato u rangbah shnong ne ki nongshynshar shnong haba ki shynshar shnong ki leh bishni pat Shaphag ka Niam ka rukom.. Hato Don ne m ka aiñ shynshar shnong u shynshar tang ia ki para Niam haka jingshisha Dei ban shynshar ia ka shnong em ym ia ka Niam..
Pynshai MA phi madam/sir halor Kane ka phang ngam sngewthuh balei kine ki nongshynshar shnong ki leh arsap Hana ki ong Ka Niam kam Dei ka Juh..
Sngewbha pynshai sir/madam ia Kane ka jingkylli jong Nga…
Khublei shibun.