Dawa U President ka KSU, ia ki seng riewlum, ban shim khia ia ka ILP

Shillong:U President rangbah jong ka Khasi Student Union u bah Lambokstarwell Marngar u la kyntu ia ki party riewlum, kiba don hapoh ka sorkar MDA ban shim khia ia ka mat Inner Line Permit, kum ba ki la kular ha ka por ba ialap election.

Haba iakren bad ki lad pathai khubor na ka liang jong u bah Marngar, u la ong ba ki seng riewlum ki ba don hapoh ka sorkar MDA, ki dei ban pynpaw haba shit ba shai, ia ka jingthmu jong ki halor ka mat ILP ym ban shu sawa tang ha ki rynsan ialap election. U la ong ba kum ba ju iohi ba ki mat treikam ba ha khmat eh jong ki party riewlum, ki dei, ka ILP; kumta haba ki la wan ha ka sorkar ki dei ban shim khia ia kane ym ban shu pynbiej ia u paidbah.

U bah Lambokstarwell u la iathuh ba ka jingdawa ILP ha ka jylla ka dei kaba la sdang ha u snem 1979 terter ha kaba ha u snem 1985, ka sorkar ka la thaw ia ki commitee ba pher bapher ban bishar ia ka jingdonkam ban pyntreikam ia ka ILP ha ka jylla.

Ha u snem 2012 ka sorkar ka la thaw ia ka High Level Commitee ka ba kynthup ia ki 13 tylli ki sengbhalang ha ryngkat ki MLA, kaba la ialam da u bah BM Lanong bad kane ka HLC, ka la ai jingmut ia ka sorkar ban pyntreikam ia ka ILP ha ka jylla, hynrei ym lah ban tip ia ka daw ka sorkar ha kato ka por ka la kyntait ia kane ka jingai jingmut jong ka HLC.
Ha u snem 2013 ka la don ka jingiakhih ka ba jur ban dawa ILP ha ka jylla ha kaba kane ka jingiakhih ka la neh haduh 6 bnai. Ha u snem 2014, na ka liang jong ka sorkar ha kato ka por ba la ialam da u Dr Mukul Sangma, ka la khot ia ka jing iakren bad ki sengbhalang ban iakren ia tai bad da kawei ka rai la shim ban wanrah ia ka Meghalaya Resident safety and security Bill ka ba la long Act ha u snem 2016.

Ka MRSSA ka dei kaba kynthup ia ki 18 tylli ki khyrdop iarung ia mih, na ka bynta ka Ri Khasi Jaintia bad 23 tylli ha Rilum Garo bad ka MRSSA ka kynthup ruh ia ki District Task Force, kaba la ialam da ki Deputy Commissioner, hynrei na ka liang jong ki sengbhalang wat la ki la pdiang ia ka MRSSA hynrei ka jingdawa ILP ka dang bteng.

Ha u snem 2018, hadien ba ka sorkar MDA ka ba la ialam da u Conrad K Sangma kala wan ha ka bor ka la don ka jingpynsngew na ka liang ki sengbhalang ia ka jingdawa pyntreikam ia ka ILP.
Ka jingkhmih lynti jong ki sengbhalang ba ka sorkar MDA kan pyntreikam ia ka ILP ha ka jylla ka dei namar ba ha ka sorkar MDA ki don ki party riewlum, kiba ki mat treikam ba ha khmat tam jong ki ha ka rynsan ialap election ka dei ka ILP, ong U Bah Marngar.

La ong shuh, ba wat la ka jingpdiang ia ka resolution ILP hapoh ka ingdorbar ka la long ha u 2019, hynrei haba la phah ia kane ka resolution sha ka sorkar India, haduh mynta ym pat lah ban ioh ia ka jingmynjur.
U la ong ba wat la ha ka sngi ba u Home Minister ka sorkar pdeng u Amit shah u la wan ha ka jylla, hynrei ki sengbhalang kim shem la iohlad ban iakren, hynrei la shu phah khubor ba u la phah wan ha u bnai Rymphang sha nongbah Delhi ban iakren halor ka ILP, hynrei hadien ba ki myntri ka MDA ki la wan na Delhi la phah ktien biang ba ha u bnai Lber u Home Minister un wan hi sha nongbah Shillong ban iakren sani ia kane ka mat bad la ong shuh ba wat la u bnai Lber la dei sa ban khylliap ia ki sngi, hynrei kam shem don kano kano ka jing phah ktien halor la jingwan u Amit Shah sha ka jylla bad kane ka pyn artatien ba ka sorkar jylla ka don jingthmu ia ka jingpyntreikam ia ka ILP ha ka jylla.

La ong biang da u heh ka KSU, ba ka seng kan ym shong kli kti bad kan ym bam jakhluid bad ka seng ka la treilang bad ka sorkar bad ka la iai shah, hynrei la ong shuh ba ki jing iakhih, katba kum ka rukom synshar paidbah, kan dang iai bteng.