Dawa U MDC ka Sohryngkham ban pynsangeh Gurudwara ha Them Motor

Shillong, 21 Jylliew:
U MDC ka seng HSPDP na Sohryngkham Konstitwensi u bah Pyniaid Sing Syiem u la dawa ha ing dorbar ba ka KHADC lyngba ka Resolution kaba u la wanrah ba ka KHADC ka dei ban pyn sangeh noh ia ka jingtei jong ka Gurudwara kaba ieng ha Them Motor. U bah Pyniaid u la wanrah ia ka mat ia kren hapoh ing dorbar ka KHADC kaba la long mynta ka sngi ban iatai ha kano ka rukom la ai bor ban tei ia katei ka jaka mane blei kaba dang tei mynta ha Them motor.
U la ong ba katkum ka jubab ba u ioh na KHADC u la ong ba kam dei ka KHADC kaba ai jingbit ban tei ia katei ka jingtei, halor katei ka nongrim u la dawa ba ka KHADC ka dei ban tih bniah mano ba la ai bor ban tei ia katei ka jingtei ha Them Motor bad u la dawa ruh ba ka District Council ka dei ban phah sangeh noh mardor khlem da pynslem ioh kloi ba la dep tei pynban ia ka tei ka jaka mane.
Shuh shuh u bah Pyniaid u la ong ba ki don ruh ki khyllah jait kiba ioh pata khyndew ha them Motor ka jaka sah ki khar motor kiba la shna ing shna sem, halor katei ka bynta ruh u la dawa ba ka KHADC ka dei ban tih bniah mano ba ai pata khyndew ia ki.
Ia katei ka mat ba la wanrah da u bah Pyniaid la kyrshan ruh da u bah Adelbert Nongrum MDC ka KHNAM na Jaiaw ha kaba u la ong ruh ba ha ka por ka jinglong CEM jong u u la pyrshang jar jar ban pynkhuid ia ka them motor. Ka kong Teilinia thangkhiew MDC na Mylliem konstitwensi haba kyrshan ia ka jingdawa u bah Pyniaid ka la ong ba ka dei ban don ka jingjurip lang (Joint Inspection) hapdeng ka Hima Mylliem, KHADC bad ki bor pyniaid District bad ban peit bniah ia ki kot ki sla ba ki briew kiba tei ia katei ka tei ka jaka mane blei ki la ioh jingbit bad ia kane ruh ka kong Teilinia ka la ong ba dei ban leh noh namarba ka por kam ap shuh.
Haba ieng ban jubab ia katei ka mat u CEM ka KHADC u bah Pynshngaiñ N Syiem u la ong ba ka District Council kan khot ia u Syiem ka hima Mylliem bad un pan jingshai halor katei ka kam,u la ong ba lada jia ba kita ki briew ki don ia ki kot ki sla ruh yn dang hap ban ia peit haduh katno kita ki pata ne ki dulir ki khlaiñ ne ki tlot bad yn leh ia kaba donkam ban leh bad ia kane u la ong ba ka District Council kan leh kloi katba lah.