Dawa U Conrad, ia ka kaiphod, kaba shisien shitaiew, ia ka jing pyntrei ia ki surok PMGSY

Shillong: U Conrad K. Sangma, myntri rangbah ka Jylla, ula iakynduh bad ki ophisar jong ka PWD lem bad ki Deputy Commissioner bapher, ban iakren halor ka jing pyntrei ia ki skhim shna surok lane ki PMGSY.

Ki nongtrei jong ka tnat PWD, ki iathuh ba ka jingtrei, ka dang iaid stet bha shakhmat, wat la ka don ka jingdkoh hapdeng U Lber haduh U Jymmang, na ka jing wan ka khlam Covid.

U myntri rangbah, ula bthah ia ia katei ka tnat sorkar, ba kan pyntrei shait shait ia katei ka kam bad ban pyndep, ha ka por ba la mang.

U Sangma, u dawa ruh na ka tnat PWD, ba kan ai ia ka kaiphod kaba thikna bha bad kaba man ka taiew, na ka bynta ba ka sorkar kan tip ia kane ka phang. Ula bthah ruh ia ka tnat PWD bad ia ki DC, ba kin peit bha ba ka kam, kan dep ha ka por ba la buh.

Na ki 971 tylli ki skhim, ba la mang pisa da ka sorkar, ka surok ka don ha ka jingjrong kaba 4303.70 Km; nangta la iathuh ba 414 tylli ki skhim ha ka jingjrong kaba 1353.12 KM, la lah ban trei pyndep, katba ki don sa 528 tylli ki skhim, kiba ha ka jingjrong kaba 2849.98 KM, ha kaba ka jingtrei, ka dang iaid shakhmat.

U Sangma, iathuh ruh ba ka donkam ruh ban pyntip online halor ka jingtrei ia ki skhim bad ban ai jingtip, halor ka jingiaid jong ki skhim, ka rukom trei ia ki kam, ki kyrteng jong ki ophisar bad ki kontraktor, ha kaba yn hap ban phah lang, na ka bynta ban peit bniah ia ka jingtrei kam.