Dawa U CEM ka KHADC na ka sorkar ban shah tang ia kiba dei hok ki nong Meghalaya

Shillong:U Chief Executive Member (CEM) ka Khasi Hills Autonomous District Council (KHADC), u bah Titosstarwell Chyne myn hynnin ka sngi, ha ka jing ia kynduh bad u myntri rangbah ka jylla u Conrad K Sangma lem bad ka Synjuk ki Nongsynshar Shnong ka Bri u Hyniewtrep, u la dawa na ka sorkar Meghalaya ba ka dei ban shah tang ia kiba dei shisha ki nong Meghalaya ban wanphai shapoh ka jylla.

Haba kren bad ki lad pathai khubor, u bah Titosstarwell Chyne, u la ong ba ka sorkar ka dei ban pynshisha ia kito kiba wanphai shapoh Meghalaya ba ki dei shisha ki nong shong shnong ba pura ka jylla, lyngba ka peit bniah iaka EPIC bad ka shnong trai jong ki bad kam dei ban ailad klumar ia ki briew ban shu pynrung kyrteng khlem da pynshisha ia ka jing long nong shong shnong trai ba pura ka jylla.

“Ka sorkar kadei ban long kaba phikir bha haba dei bad ka jing shim kyrteng ia kiba wanphai shapoh Meghalaya daka peit bniah iaki EPIC jong ki bad ka sorkar ka dei ban shah hi tang ia kiba dei hok kita ki nong Meghalaya ban rung shapoh ka jylla” la bynrap u bah Titosstarwell Chyne.
Ha badei bad kane, na ka liang u symbud myntri rangbah ka jylla u bah Prestone Tynsong u la ong ba ka sorkar ha ka jing pynrung kyrteng ka la pan iaka EPIC bad ka kyrteng ki kmie ki kpa nalor ka jaka sah bad ka ‘Bank Account’ jong kito ki samla kiba thmu ban wanphai shapoh Meghalaya.