Dawa U Bah Pangniang ban pynlong ‘Kpa Alphabet Khasi’ ia U Thomas Jones

Shillong, 14 Nailur:
U MLA ka HSPDP na Rambrai u Bah Phlastingwell Pangniang u la dawa ba ka sorkar ka dei ban ithuh ne niew ia u Pastor Thomas Jones kum u Kpa Alphabet Khasi namar ba u dei uwei uba la wanrah ia u dak thoh ia ka ktien Khasi ha ka spah snem ba 18.
Haba wanrah ia kane ka mat hapoh iing dorbar, u Bah Pangniang u la ong ba u Pastor Thomas Jones u dei uba la wanrah ia ki dak thoh Khasi bad kan dei kaba iahap dur ia ka sorkar ba kan ai nam noh ia u kum u Kpa ki Dak Thoh Khasi.
“Wat ki riew wad bniah ruh ki la niew ia u Thomas Jones kum u kpa ka dak thoh Khasi”, la ong u Bah Pangniang.
Hynrei haba jubab ia kane, u myntri ka tnad Arts and Culture u Bah Ronnie V Lyngdoh u la ong ba ka sorkar kam pat don ka jingthmu ia kane ka kam namar ba ka dang bishar bniah shwa ban lait ioh mih ki kynrum kynram hadien shwa ban leh ia kane ka kam.
U la ong ba shwa ba u Thomas Jones, la don da uwei phareng u William Carey ha u 1824 uba la pyrshang ban wan rah dak thoh ia ki Khasi da ka ktien Bengali bad u Thomas Jone u la wan ha u snem 1841.
“Ka sorkar kan bishar bniah shwa halor kane shwa ban shim ia kano kano ka rai khnang ban kiar ioh mih ka kynrum kynram hadien habud”, la ong u Bah Ronie.
Halor ka jingkylli u Bah Paul Lyngdoh la ka sorkar ka don jingthmu ne em ban rakhe ia ka sngi u Thomas Jones, u Bah Ronnie u la ong baka sorkar kam ju rakhe bad kan sa eksamin bha ia kane ka kam ruh.