Dawa subjek Khasi ka KSU ha skul Bengalee Boy’s & Girls

Shillong, 25 Iaiong:
Ka seng KSU Laban Circle ka la dawa na ka skul Bengalee boy’s bad Bengalee girls ba ki dei ban pynrung ia ka ka subjek khasi hapoh skul kiba don ha thain Laban.
Ka seng ka sngew khia ha kaba iadei bad kane ka bynta namar ba ka ktien Khasi ka la sdang ban hiar ha kine ki thain bad kawei na ki daw ka long ba kum kine ki skul kiba paw kim shym don ia ka subjek khasi.
U education Secretary ka KSU Laban u Bah Emanuel Syiem Mal ngiang u la ong ba haba ki dkhot ka seng ki iakren bad ki bor pyniaid ka skul, ki la ai daw ba kim don jingeh ban pynrung ia ka Khasi subjek ha ka skul jong ki pynban ki pyni ba ka dei ka sorkar bym shym la shim khia ban mang pisa ia ka kam kaba ki la dep phah.
Kumta ka seng ha kajuh ka por ka kyntu ruh ia ka tnad pule puthi jong ka sorkar jylla ba kan shim khia haba iadei bad kane ka bynta ba kan leh ruh ia kiei kiei kiba donkam.