Dawa siew bai lutksan ia ki 7ngut

Jowai, 6 Nailar:
Ki saw tylli ki seng bhalang ka East Jaintia Hills District mynta ka sngi hapoh ka jingialam u Bah H.Rymbai Vice President ka KSU-KC, u Bah W.Suting General Secretary ka AJYWO-EJZ, u Bah T Rymbai President ka FKJGP-KC bad u Bah J Nongtdu President ka HNYF-EJZ, ki la leit ia kynduh ia u Additional Deputy Commissioner jong ka East Jaintia Hills District, u Bah CS Laloo ban ia kren bad u ban pynkloi noh ia ka jingai jingiarap sha kiba ha iing ha sem jong kito ki 7 ngut ki ba la khlad noh ha ka jingshah bat bording eletrik ha Khliehriat West ha une u bnai ba la dep.
Ha kane ka jingia kynduh jong kitei ki nongialam jong kitei ki saw seng, ia u tei u heh jong ka EJHD, ha ryngkat ka jingiadon lang u bah MH Dkhar President ka AJYWO Sengkmie bad u Bah SS Niangti General Secretary ka KSU-JHDU ha ba ia kren bad u tei u heh ka EJHD, u la kular ha khmat ki nongialam jong kitei ki saw seng ba na ka liang jong ka sorkar kan pynkloi noh kat ba lah ban pynioh ia ki jingiarap ia kiba ha iing ha sem jong kito ki 7 ngut ki ba la khlad noh ha kaba u la kular shuh shuh ban ba un pyndep ia kane kam hapoh ka 12 tarik mynta u bnai.
Ka KSU, AJYWO, FKJGP bad ka HNYF, ka la pynpaw ia ka jingsngewnguh ia ki bor district ka EJHD bad ia ka sorkar hi halor ka jingkular jong ka ban iarap ia sha kiba ha iing jong kitei ki 7 ngut ki ba la khlad noh bad ruh ban pyndep kloi ia kata hapoh ka 12 tarik mynta u bnai.