Dawa shuti, ha ka sngi iap ki 2 ngut ha Mookhep

Shillong,18 Nailur:
Ka EJNC ka la dawa ba ka sorkar ka dei ban pynbna sng shuti manla u snem ha East Jaintia Hills ka 24 tarik u nailur kaba dei ka sngi iap jong ki 2 ngut ha ka jingshah siat ha ki pulit ha Moohkep ka kong Setlang Phawa bad u bah Derstmon Siangshai ha ka por ba ia khih pyrshah ia ka jingkhang tih dewiong ha kane ka jylla. Katkum ka jingkren u President katei ka seng u Shanbok L Syad u la ong ba ka jingiap jong kitei ki 2 ngut ka dei ban kynmaw burom kum ka sng iap ki riew khraw namarba ka jingiap jong ki ka dei na ka bynta ban ia khih ia ka jingiakynduh ki paidbah ka jylla.
Ha ka jingiakren bad ki nongthohkhubor, u la ong ba ha ka 24 tarik mynta u bnai katei ka seng kan kynmaw burom ia kitei ki 2 ngut kiba la iap da kaba deng lama iong ryngkat ka jingialang paidbah ka ban sdang naduh ka por 2 baje ha ka jaka ba ki shah siat ha Mookhep bad ha ka por janmiet pat kin thang mombati. U la ong ba yn pyndeng lama iong ia ki paidbah kynthup ki nongniah kali ha katei ka district.
Halor katei ka jingdawa ban pynbna shuti u President katei ka seng u la ong ba katei ka seng ka la dep ai jingthoh sha u Deputy Commissioner ka East Jaintia Hills bad ka la leit ruh ban ia kynduh ia u mynta ka sngi hynrei kam shym la ioh ban ia kren namarba u donkam kyrkieh kumta ki la ioh ban ia kren bad u ADC ha kaba ki la kular ba ki bor District kin shong jingialang ban shim rai ia katei ka kam bad shen kin sa pyntip hi sha ki lada ka lah ne em ban leh kumta.
Katei ka sengbhalang ka la khot la wer ia baroh ki sengbhalang , ki paidbah , ki khynnah skul ba kin ia snohkti lang ha katei ka sngi kynmaw burom. U President katei ka seng u la ong ba ka seng ka la kyntu ia ki skul ki kolej ha katei ka District ban khang ha katei ka sngi ban ia snohkti lang ha katei ka jingleh burom ia ki 2 ngut kiba shah siat ha Mookhep.
Katba uwei na ki bahaing jong uwei na kiba shah siat u Phllip James Bamon u la ong ba haduh mynta ki bahaing kim pat ioh ia ka jingdawa bad haduh mynta ki dang ioh jingiarap T.3 lak tyngka kaba ki la pdiang ryngkat ka jingpyrshah katba na ka liang jong ki pat ki la dawa T.10 lak tyngka ryngkat ka kam ka jam ia ki ba ha iing na ka iing ka sem kiba iap. U la ong ba kham mynshuwa kiba haing ki la rai ban shah thngan namar ka jingsngap mynthi ka sorkar hynrei hadien pat u la ong ba u myntri rangbah ka jylla u la khot ia kren ia ki bad u la ong ba u la kular ban pyndep ia katei ka jingdawa jong ki bad ki la buhteng noh shipor ia ka jingshong shah thngan.