Dawa sei madan ka KHNAM ia ka result Jaguli

Shillong, 24 Jymmang:
Ka KHNAM Youth Wing mynta ka sngi ka la dawa na u myntri tnad bording ka jylla u Clement R Marak ba ka sorkar lyngba ka tnad MeECL ba ka dei ban sei madan noh ia ka result kaba la shu set kut la san snem jong ki kam jaguli.
“U Myntri u la kular khot jingialang noh ia ki ophisar ka MeECL bad ban sei madan noh ia ka result hapoh shi taiew”, la ong u President ka KHNAM Youth Wing u Bah Thomas Passah hadien ba la iakynduh ia u Myntri mynta ka sngi.
Kine kiba ialeh ia ka kam jugali kaba lait 306 tylli ki la dep ialeh ia ka eksamin naduh u snem 2012 hynrei la  san snem khlem pat ioh result, la ong u president ka KHNAM. Kaba lyngngoh ka long ba ha une u snem 2015, la pynialeh eksamin ia ka kam Junior Engineer (JE) , Assistant Junior Engineer (AJE) kiba don kumba 34 tylli hynrei tang ha u bnai Nohprah, ki la dep pynbna ia ka result katba ia ka kam jugali kaba rit ruh haduh san snem ruh kim pat lah ban pynbna.
“Lada ka ong bym don pisa ban thung kam ia ki jugali, balei ia ki JE, AJE pat ka thung wut wut, ka ioh pisa naei”, la ong u Bah Passah.
Ka KHNAM ka la ong ba u Myntri um shym la pynshai ia kaei ka daw ba pynslem ban pynmih ia ka result wat hadien san snem ruh.
Ha ka jingshisha, ka KHNAM ka la dep iakynduh teng ia u Myntri bording ha u bnai Iaiong ba la dep hynrei ka jingbym ioh jubab, ka la pynlong ba kin iakynduh biang mynta ka sngi.
U Bah Passah u la ong ba kin ap ia ka kular jong u myntri shi taiew aiu ka sorkar kan leh halor kane.