Dawa pynsangeh interview ki 1000 ngut ki samla Jaintia

Shillong,12 Nailar:
Ka Myntri ka kam pohing ka sorkar jylla ka kong Roshan Warjri, ka la kular ba kan ia kynduh ia ki nongialam jong ka seng HNYF ban ia kren halor ka jingbym hun ki 1000 ngut ki samla Jaintia ba la pass ia ka written Test ha ka kam pulit 6th Batallion hynrei ki bym shym la shah khot pat ha ka Personal Interview.
Namar katei ka jingbymhun wat la la ioh ki jingpynshai na ka tnad pulit ki 1000 ngut ki samla Jaintia ki la dawa ban pynsangeh shuwa ia ka Personal Interview kaba ka tnad pulit ka la khot lashai ka sngi. Hadien ba la ia kynduh ia ka Myntri ka HNYF ka la iathuh ba ka Myntri ka la kular ban shim khia ia katei ka kam ban ia kren bad ki bor pyniaid ha katei ka jingpynrung kam ban pynbeit ia ka jingbakkla jong ki. “Ka Myntri ka kam pohing ka la kular ba kan shim khia halor katei ka mat pynrung kam pulit ban bthah ia ka Board ban pynbeit ia ka jingbakla jong ki” ong u samla Donbok Dkhar President HNYF Central Body.
Lah ban pynkynmaw ba ka tnad pulit ka la ai jingshai ha ka taiew ba la dep ba ka jingbym khot ia ki samla ba la pass ha ka written test sha ka Personal Interview ka dei namar ka jingbun palat ki samla kiba la pass ia ka written test kaba long ruh 1.5 shah ia ka jinglait ka kam, dei na kata ka ka daw ba kiba la ioh rit mark ym shym la khot sha ka personal interview.