Nongpoh,18 Nailur:
Ka Hynniewtrep Youth Movement Ri-Bhoi District, ha ka jingleit jurip ia ki katto katne ki jaka jong ka surok 4lane Ri-Bhoi ka la lap ia shibun ki jingduna ha ka jingsangeh treikam jong ki ar tylli ki company ha Ri-Bhoi. Ha ki babun ki jaka, la don ka jinglang um ha surok, ka jingtwa khyndew bad ka jingdam noh ki nala um, halor kane ym don ba shim ia ka jingkitkhlieh ban pyllait ia kine ki jingeh kiba ktah ia ki kali bad ki nongleit nongwan ha ki ba bun ki rukom namar ka jingsangeh treikam jong kine ki Company mynta la bun bnai.
Kawei ruh kaba ki paidbah, ki nongleit nongwan bad ki driver kali ki ud ka long halor ka jingshim turning V shape kata ruh ha ka jaka ba long sharing bad pynnoh. Kane ka jingshim V shape ka jong ki ha ki katto katne ki jaka ka la wanrah bun ki jingma ha kaba ki nongniah kali kim lah shim turning kynsan bad poi haduh u pud ban sangah sharud surok.
Tang ha kine ki sngi bym pat dep pura ka surok, bad ba shu iaid divert bun tylli ki kali ki la sangah sharud ka surok. Kaba isohsat shuh shuh ka long, haba iaid kito ki kali jrong (Kali kit kali) ki ba pyndap lut ia ka surok baroh bad ka lah ruh ban syllad ia kito ki kali ka ba iaid marjan. Lada dei tang U shape ruh dang suk bad kham biang hynrei kane ka V shape (60 degree, Geometrical calculation) ha ryngkat ka jingkah lump, kan wanrah ia bun ki jingmynsaw hadien habud ia u paidbah nongleit nongwan.
Ha kaba iadei bad kane, ka HYM Ri-Bhoi District lyngba U Secretary Bah C.L. Nongbet ka kyntu jur ia ka ILFS bad ka NHAI ba kan shimkhia noh kham kloi ha kaba ia dei bad ki kam ki jam ka jong ki bad ban ai noh ia ka hukum ban trei, khnang ba ki kompani kin lah ban jam sha khmat na ka bynta ka jingbit jingbiang lang jong ki nongleit nongwan lyngba ka surok NH-40.
Phi don ban ong eiei?