Dawa Police Station ka UDP ha Mawlasnai Buh da uba ia sngewthuh ktien

Shillong,2 Nailar:
Halor ka jingeh ba ki nongshong shnong ka Sabuda -Ri-Bhoi District ki ia kynduh ka UDP mynta ka sngi ka la phah ia ka shithi dawa jong ka sha u Myntri Rangbah ka Jylla u Dr.Mukul Sangma ban dawa na ka sorkar ba ka dei ban kyntiew kyrdan ia ka Mawlasnai Out Post sha ka Police station kum juh ruh ka Out Post ha Umwang, Umtlih bad Sabuda.
Ka la dawa ruh ba ka bor pyniaid district ka dei ban buh da u ophisar u ban khlieh ia katei ka ophis da uba sngewthuh ktien, ban ia kren bad ki nongshong shnong. Ka UDP ka la pynkynmaw ruh ba ka sorkar jyla ka la phah ia ka 5th Batallion sha Delhi la 3 snem mynta katba ha katei ka jaka pat ym don ki bor pahara kiba biang kumta ka UDP ka a dawa ba ka sorkar ka dei ban wanrah ia kitei ki Batallion sha katei ka jaka kaba donkam ban peit ia ka shongsuk shongsain u paidbah.
Shuh shuh ka UDP lyngba ka shithi ba la phah da u Working President jong ka u Bah Paul Lyngdoh sha u Myntri Rangbah ka la pynsngew sha ka sorkar ba ka dei ban pynbha pat ia ka kamra shet jong ka skul Sabuda Presbyterian School kaba la bei tyngka da ka SSA kaba la shah ktah, ha ka jingwan thombor ka Assam.