Dawa na u Lat ban pynhiar shuki ia u Mukul bad u para

Shillong, 6 Rymphang:
Ka North East Indigenous Garo Law Promoters Association (NEIGLPA) ka la dawa tuklar na u Lat ka jylla u KK Paul ban pynhiar shuki noh ia u Myntri Rangbah ka jylla u Mukul Sangma bad u para jongu, u Zenith Sangma halor ban ailad ia ka jingtohkit halor ka jinglong Scheduled Tribe (ST) jongki, kan long kaba khuid ba suba.
Ka NEIGLPA bad u nongshong shnong ka Nokgilawe u Tennydard M Marak na Williamnagar ha East Garo hills district u la pan ia ka jingtuklar u Lat ba kine ar ngut ki dei ban hiar shuki noh.
Kane ka jingkyntu ka la wan hadien ba ka Supreme Court dang shen ka la pynmih ia ka hukum ha ka 20 tarik Kyllalyngkot kaba bthah ia ka National Commission for Scheduled Tribes (NCST), New Delhi ban pynlong ia ka jingtohkit halor ka jingai kyrdan ST ia u Myntri Rangbah bad u para jongu ba dei ruh u myntri sorkar. Ka Supreme Court ka la ai por ba dei ban pyndep ia ka jingtohkit hapoh phra bnai.
U Marak u la ong ha ka dorkhas ba la aiti ha u Lat ba kam long kaba dei ban ailad ia u Mukul Sangma ban bteng ia ka kam myntri rangbah bad u para jongu u Zenith Sangma namar ba kan pyndkoh ia ka rukom tohkit jong ka Commission.
Lah ban kdew ba u Myntri Rangbah bad u para jongu, u la shah ujor halor ka jingkynnoh ba um dei u ST.