Dawa na ka sorkar, ban tuklar halor ka jingthut ding ha Ri Bhoi

Nongpoh, 08 Nailur:
Da kaba sngewkhia halor ka jinglip khah khah jong ka bording ilektrik ha ka Distrik hi baroh kawei, kaba la wanrah jingeh ruh ia ki paidbah na ka jingbymbiang bording, mynta ka sngi ka Ri Bhoi Youth Federation (RBYF) Sengkmie, ka la mih pyrthei ban pynrem jur ia ka MePDCL, halor kane ka jingbym lah ban ban ai ia ka jingshakri kaba paka ia ki nongpyndonkam bording.
Halor jong kane ka jinglip bording, na ka liang u Bah Liander Nongshli, Finance Secretary ka RBYF, Sengkmie, u la ong ba kane ka jingthut ka bording hapoh ka district ka la kylla long pynban kum ka jingmlien, ha kaba ka jinglip bording ka la jia jan manla ka sngi bad kaba kham pynlyngoh eh ka long ka ka bording ka lip wat haba don jingpynthut da ki bor mariang ruh.
U la ong ruh, ba ka seng la bunsien ka la iohsngew ia ka jingud na ki paidbah ha Ri Bhoi, halor jong kane ka jingthut ba khah khah jong ka bording ilektrik bad kaba kham sngewkhia halor jong kane ka long ba ka lah ruh ban ktah wat ia ki samla pule, namar khlem ka bording ka long kaba eh ba ki pule kot, khamtam ha ka por mynmiet, la bynrap u Bah Liander Nongshli.
Kumta, haba iadei bad kane ka jinglip khah khah ka bording, ka seng ka buh ruh ia ka jingdawa sha ka sorkar jylla ba ka dei ban tuklar lem ia kane ka jingeh kaba la iakynduh da ki paidbah ha Ri Bhoi, katba ia ka bai bording pat ki paidbah ki hap ban siew beit manla u Bnai, u la bynrap.