Dawa maramot surok Khliehriat

Jowai, 6 Naiwieng:
Ka jingsniew palat jong ka surokbah NH-44 ha kiba bun ki bynta khamtam ha ki bynta jong ka shnong Khliehriat kala pynlong ia ka seng HNPF, East Jaintia Hills District lyngba u ma Marshall Biam ban dawa kyrkieh ia ka tnat sorkar ba dei peit ia kane ka surok ba kan maramot noh shisyndon khlem da da pynslem shuh. U ma Biam u ong ba kine ki bynta kiba sniew eh jong kane ka surok ka dei ka bynta kaba iaid ba ieng jong ki khynnah skul kiba pule ha Khliehriat Higher Secondary School bad Holy Family English School. Ula ong namar ka jingsniew ka surok ki kali rit bad kali heh ban pyniaid ia ki thliew ki syar bunsien ka long ka jingma ia ki khynnah skul kiba leit skul ha kine ki skul bad kumjuh ia ki nongiaid nongieng lyngba kane ka surok. U ma Biam u pynkut da kaba kyntu ia ki bor sorkar ba dei peit ia kane ka surok ba kan maramot khlem da pynslem shuh khnang ban lait na kino kino ki jingjia ba sngewsih ia ki nongiaid nongieng ha ki bynta jong kane ka surok.