Shillong: Ka kynhun ki nongialam ka All India Garo Union (AIGU) bad ka Garo Students Union (Khasi Hills Zone), ki la dawa na u myntri sorkar ba peit ia ka tnad ka koit ka khiah u bah AL Hek ba un iakren bad ka sorkar, ban bhah ia ka jingpule doktor (MBBS) mar biang katkum ka bhah ka jylla hapdeng ki samla Garo bad Khasi & Jaintia ha NEIGHRIMS, Shillong.
Kine ki nongialam ki kynthup ia u Elbert Marak u president ka All India Garo Union, u Fremiush D. Sangma na ka Garo Students Union (Khasi Hills Zone) bad u Rinaldo K. Sangma ki la ong ba la bhah 5 tylli ia ki Khasi& Jaintia bad 4 tylli ia ki Garo ha u snem 2016-17.
Hynrei na kane ka 9 tylli ba la mang ia ka Meghalaya ha NEIGHRIMS, ym don Garo uwei ruh ha kane ka snem 2018-2019.
Ki la ong ruh ba ha u snem 2017-18, la ai bhah 7 tylli ia ki Khasi & Jaintia bad 2 tylli ia ki Garo hynrei ha kane ka snem, ym don uwei u Garo ba la ioh bhah ha NEIGHRIMS.
Ka seng ka la kyntu ia u myntri ban peit ia kane ka kam bad ban bthah ia ki bor ba dei peit ban pynbeit ia kane ka jingdkoh ha kaba iadei bad ka jingsam ia ka bhah pule doktor na ka bhah ka sorkar jylla.