Dawa Laskein Civil Sub Division, na U MR

Shillong:U MLA ka Mowkaiaw constituency, u bah Nujorki Sungoh, myn hynnin ka sngi u la lum ia ki MDC bad ki rangbah shnong ka thain Laskein ban iakynduh ia u myntri rangbah ka jylla u Conrad K Sangma ban dawa kyntiew noh iaka Laskein Block sha ka Civil Sub-division.

Haba kren bad ki lad pathai khubor u bah Nujorki, u la iathuh ba kane ka jing dawa ban kyntiew iaka Laskein Block sha ka Civil Sub-division ka dei kaba la slem bha, namar wat ki MLA barim bad ki sengbhalang bapher bapher napoh ka thain, ki la ju pynsngew sha ki sorkar jylla bala dep ban kyntiew noh ia ka thain sha ka sub civil-division.
“Ka Laskein block ka dei kawei ka block kaba la rim bha namar la thaw ia ka naduh 11 tarik Risaw 1973 bad ka jing don bun paidbah ki nong shong shnong ruh ka la bun bha namar katkum ka census jong u snem 2011 ka kdew ba ki don haduh 90 hajar tam ngut ki paidbah nong shong shnong hapoh kane ka block” la ong u bah Nujorki.

U bah Nujorki, u la iathuh ba hapoh kane ka block ki don haduh 87 tylli ki shnong bad ka jing dawa kyntiew noh ia ka Laskein sha ka civil sub-division, ka dei na ka bynta ban kyntiew iaka ioh ka kot hapoh kane ka thain da ka ba wanrah shi bun tylli ki kam pynroi hapoh kane ka thain. Shuh shuh u bah Nujorki u la ong ba kane ka jing kyntiew iaka Laskein sha ka civil sub-division kan iarap ban pynbiang ki lad jing iarap ia ki paidbah nong shong shnong kiba don haki thain khappud khamtam iaka Block I kaba dei ruh ka jaka ba ju mih ki jing iakynnad.

U bah Nujorki u la iathuh ruh ba hapoh ka Laskein block ki don haduh 5 tylli ki MDC konsitwensi bad 2 tylli ki MLA konstitwensi bad kum shi bynta ban pynjan ka jing synshar bad ki paidbah ka sorkar kadei ban kyntiew noh sha ka civil sub-division.
Haba kylli halor ka jing kular u myntri rangbah iaka jing dawa, u MLA ka Mowkaiaw konstitwesni u bah Nujorki Sungoh u la ong ba ka jing ialang ka long kaba biang, hynrei u myntri rangbah um shym la kular eiei ia ka kynhun hynrei u la ong ba un sa bud dien ia ka jing dawa kyntiew ia ka Laskien Block sha ka Civil Sub-division.