Dawa kiba duna dkhot met ban thung dkhot ha MPSC bad DSC

Shillong: Ka Federation of Persons with Disabilities (FPwD) myn hynnin ka sngi ki la iakynduh ia u Myntri Rangbah ka Jylla u Conrad K. Sangma ha ingsah jongu bad aiti saw tylli ki mat ba ka sorkar kan leh eiei.
Kine ki mat ki long ban ailad ia ki briew ba duna dkhot met ban long dkhot lang ha ka Megha laya Public Services Commission (MPSC) bad kumjuh ha ki District Selection Committee (DSC) kiba don ha man ki district ha ka jylla.
Kawei pat ka long ban pyntreikam pura ia ka bhah thungkam kaba 4 percent kumba la mang da ka parliament ia ki briew kiba duna dkhot ha baroh ki tnad sorkar. Ka FPwD ka la dawa ruh ba ka sorkar ka dei ban pynlong nongtrei ba pura ia kito kiba duna dkhot met kiba treikam shipor kum ki muster roll ha ki tnad sorkar bad ban kyntu ia ka sorkar ba kan iakren ia ki kynhun shimet ne ki kompeni ban ai kam ne thung kam ia ki briew kiba duna dkhot met.
Haba kren hadien ba la wai ka jingialang bad u myntri rangbah, u Bah Michael Thongni u dkhot ka Federation u la ong ba u Mynytri Rangbah u la ai ka rai ban shong jingialang bad ki ophisar jong ki tnat bapher bapher ka sorkar Jylla ban iakren ia kine ki mat jingdawa jong ki, bad un sa pyntip pat ia ki hadien.
U Bah Michael ula bynrap ba ka jingkynduh ia u Myntri Rangbah ka long ban pynkynmaw ia kaei kaba ka jingdawa jongki , la dawa naduh ki 8, 9 snem mynshuwa bad lada ka sorkar kam sngap ka Federation kan iaid noh da ka sien jam kaba tyngeh da kaba leit noh sha ka Iing Bishar lyngba ka PIL.
U bah Michael u la iathuh ba u myntri rangbah watla um shym la kular hynrei u la pynthikna ban bishar ia kine ki mat jingdawa jongki.
U la iathuh ha ka por jong ka jinglong Myntri Rangbah u Dr. Mukul Sangma haduh shi hajar sien ki la pynher dorkhas sha u bad sha ki ophisar Rangbah ka jylla ban ai noh ia ka hok jong ki hynrei kine ki leh kuman.
Ha kawei liang pat ka Federation ka ai khublei kyrpang a uwei ophisar rangbah uba long u Deputy Commissioner barim ka West Khasi Hill u Arun Kembhavi, IAS uba la kloi ban iarap ia ki haba ki leit ud ban pan jingiarap.