Shillong, 8 Naitung: Haba pynrem jur ia ka jingleh donbor ka UCIL da kaba khot tender lyngba ki lad jingpynbna, ka KHNAM State Youth Wing ka la pyrshah ruh ia ki jingkren jong u myntri rangbah kiba u la ong ba ka UCIL ka lah ban tih Uranium hynrei ka hap ban kitkhlieh hi lada jia eiei, ka KHNAM ka la ong ba u myntri rangbah u dei ban kren da kaba shai halor katei ka phang.
Ka KHNAM ka la ong ruh ba ka sorkar jylla ka dei ban jingshai na ka sorkar pdeng halor katei ka bynta, ka la kynthoh ruh ba ka jingkhot Tender khlem ka jingbit na ka sorkar jylla bad ka KHADc ba ka dei ka jingleh donbor ka sorkar pdeng bad ka UCIL. Ka la pynrem jur ia ka seng BJP kaba bunkam ban pynkhlaiñ seng ha ka jylla kumno ban ioh pyntroiñ ia ka jaitbynriew.
“Ngi la tip hi ba ka India ka la pynpaw ka jingthrang ban rung sha ka Nuclear Suppliers Group (NSG) bad ngi kum ka jylla ba don ia une u mar poh khyndew, ngin ym ailad ba ka jaitbynriew jong ngi kan long langknia. Ngi la iohi ba la bun ki nongialam shnong bad ki seng ki ba la dawa ban ai noh ia ka NOC ban shna noh ia ka surok Mawthabah ban wan ka roi ka par ha ki thain west khasi hill, hynrei dei ka UCIL bad ka Sorkar kmie ki ba long ki mawjingthut. Ngi dawa ba ka sorkar jylla bad ka KHADC kan shimkhia ban pan jingpynshai naka UCIL halor ka jingkhot tender khlem da ai jingtip” ong ka kyrwoh na ka KHNAM.
Ha kawei pat ka khubor.ka Synjuk ki Seng Bhalang (SSB), West Khasi Hills District, kaba kynthup ia ka WPM, WKMYF, WYWC, WKSU,WYF, WPYDO, ka la lum jingialang kyrkieh mynta ka janmiet bad katei ka jingialang ka la rai ban pyrshah ia ka jingtih Uranium da kaba dawa na ka UCIL ba ka dei ban pynduh pyndam noh ia katei ka Tender ba ka la pynbna.
Katkum ka kyrwoh khubor lyngba u bah T.S.Shangrit Chairman bad Donald Nongsiang Secretary jong katei ka synjuk, la ong ba ka jingpyrshah ka la mih ruh hadien ba ki la iohi ia ka tender ba la pynmih da ka UCIL myn ha ka 2 tarik mynta u bnai lyngba ka Tender Notice No.UCIL/KPM/MEGHALAYA-002 ba la soi da u Shri.P.N.Sarkar General Manager (Open-pit) Turamdin Mine P.O.Sundernagar District East Singhbhum, Jharkhand kaba khot ia ki kompani ban tih ia utei u mar.
Phi don ban ong eiei?