Dawa ki nongshet ja sngi ban pynheh bai nong bad sangeh thang da ka dieng

Shillong: Ka All Jaiñtia Mid Day Meal Workers Union, (seng kmie), Jowai ka la dep ai lyngba ka jingthoh sha u Conrad K Sangma Chief Minister Meghalaya, ban pynkiew ïa ka bainong na ka shispah tyngka shi bnai sha ka shi hajar tyngka bad ban ïa kren bad ka sorkar India na ka bynta ba kan pynkiew na ka khyndai Spah sha ka saw hajar tyngka ha ka shi bnai bad kyllum ka jing siew kan long San hajar tyngka ha ka shi bnai. Nangta ban siew bainong na ka shiphew bnai sha ka khadar bnai ha ka shisnem bad ban siew man la u bnai hapoh shiphew tarik jong u bnai ban mih. Kumba long haduh mynta, kiba shet ja sngi na ka bynta ki Khynnah skul, ki thang da ka dieng kaba ktah shisha ym tang ïa ka koit ka khiah hynrei khamtam ïa ka mariang kumta la dawa na ka sorkar jylla ban ai noh da ka LPG ïa ngi kumba ka la dep shna ïa ki ïing shet ja ha ki skul. Ka koit ka khiah ki nongshet ja sngi ka dei kaba kongsan tam, khamtam ïa ki longkmie ki kynthei kumta la dawa na ka sorkar jylla ban ai lad, ban ïoh ban shim shuti lada lap ka pang shitom kumjuh ïa ka lad ïarap pisa. Ka jingstad haka pule ka puthi jong ki khun ka dei kaba kongsan ha kane ka juk ba mynta, kumta ngi dawa na ka sorkar jylla ban ïarap ïa ngi ki nongshet ja sngi da ka pisa lada ki khun ki poi kham shakhmat ha ka exam jong ka jylla, khnang ba ki khun ki ïoh ban leit pule pyntbit sha ki school bah bad sa kiwei kiwei ki jingkyrpad ba la dep ai.

Kumta halor kitei ki jingdawa kiba ki la buh hakhmat jong u Conrad K Sangma Chief Minister naduh ka 03/02/2019 bad ka shithi jingpynkynmaw ha u bnai December 2021 ha u DP Wahlang Adll Chief secretary kumjuh uba peit ïa ka tnat pule ka jylla. Haduh mynta ki sngap jar khlem ai jubab na u Conrad K Sangma Chief Minister bad ka tnat pule ka sorkar jylla, ka seng kam banse ban khot ïa baroh kiba trei kum ki nongshet ja sngi ha ka Mid Day Meal ne mynta ka PM – POSHAN ka jylla Meghalaya, ha ka jingïalang paidbah ka ban long ha ka 21/03/2022 ha ka por 10:00 mynstep ha Deva Kumar Hall Bishnupur Lumshatsngi Kench’s trace hajan ka Sankar Dev college, Laban Shillong. Ha kane ka jingïalang yn shim ïa ka rai kumno yn ïaleh halor kane ka jingjynjar kiba ki mad sah mynta la palat ïa ka khad san snem tam, ong ka kyrwoh na u Samla Jerry Suting, President bad ka Kong Joyce Lypon, General Secretary, All Jaiñtia MDM Workers Union, (CEC) Jowai.