Dawa ki MDC Congress mar T. 1.50 klur, kyntait u CEM ka KHADC

Shillong: U Chief Executive Member (CEM) ka KHADC u bah Teiñwell Dkhar ka Khasi Hills Autonomous District Council (KHADC) u la kyntait ia ka jingdawa ki MDC ka Congress ban bhah ia ka pisa ba ioh na ka sorkar pdeng ka Special Assistance mar T. 1.50 klur ia ki MDC ka Council.
Haba kren sha ki nongthoh khubor myn hynnin ka sngi, u CEM u la ong ba ki MDC ka Congress kila iakynduh ia u ban dawa pynheh ia ka jingbah pisa na ka T. 50 lak sha ka T. 1.5 klur ia ki MDC.
U CEM u la ong ba ka Executive Committee (EC) ka la shim ia ka rai bad kan bat beit ia kane ka rai. U la kyntait ruh halor ka jingkynnoh ka Congress ba ki don ki MDC ki bym tip ia kane ka rai.
“Ka dei ka rai ka EC bad ngin bat beit ia kata”, la ong u bah Teinwel.
Shwa ia kane, mynta ka sngi ki MDC ka liangpyrshah ka Congress ha Khasi Hills Autonomous District Council (KHADC) kila dawa na ka Executive Committee ban pynkiew ia ka jingbhah pisa na ka T. 50 lak sha ka T. 1.50 klur sha ki MDC.
Ki MDC ka Congress kila ai jingthoh ruh sha u Chief Executive Member (CEM) ka KHADC u bah Teiñwell Dkhar halor kane.
U nongialam liangpyrshah ha KHADC uba dei u MDC ka Congress u bah Lamphrang Blah u la pynpaw ia ka jingbym sngew tynnad ia ka rukom bhah skhim ka Executive Committee (EC) ia ki MDC.
Ka KHADC ka dang ioh T. 34 klur na ka T. 52 klur na ka sorkar pdeng. Katkum ka jingong ki MDC ka Congress, na ka T. 52 klur, dei ban sam mar T. 1.5 klur ia ki MDC.
“U CEM u la ong ba ka dei ka rai ka EC bad kin sa peit ia kane”, la iathuh u bah Lamphrang haba kren sha ki lad pathai khubor.
Katba nongai ktien ka Congress Parliamentary Party u bah Ronnie Lyngdoh u la ong ba watla u CEM u la ong ba ka dei ka rai jong ka EC hynrei ki don ki MDC ka UDA (United Democratic Alliance) kim bym tip ia kane ka rai.
“Wat kiba don ha ka liangsynshar kim tip ia ka rai ka EC. Ka paw ki shim rai tang ki katto katne ngut”, la kynnoh u bah Ronnie.
U Bah Ronnie u la ong ba ban pyntreikam ia ka pisa ka Council, dei ban don ka District Council Level Committee ban khlieh u CEM hynrei kane kam don satia haduh mynta.