Dawa khanglad ka MCVU ia ki kali mar bar jylla ban kamai

Shillong, 9 Jymmang:
Ka Meghalaya Commercial Vehicle’s Union(MCVU) hadien ba la iohi ia jingeh jong ki Kali kit Mar kiba dei trai da ki trai ri trai muluk namar ka jingiohlad jong ki Kali kit Mar na shabar jylla ban kit ia ki mar hapoh ka jylla khlem da don ki kot ki sla kiba biang khamtam ka Trading Licence na ki District Council. Kane ka jingiohlad jong ki ban kamai laitlan hapoh jylla, ka la long pynban ka jingiuhroit ia ki hok kamai jong ki trai ri trai muluk bad ka long ruh kumba knieh ia ka pliang ja jong ki briew ka Jylla, da ki briew na shabar . Kum kane ka jingiohlad ki briew na shabar jylla kan nym jia koit ha kawei ka jylla kaba ki briew na shabar kin ioh leh katba mon.
Kumta na ka liang ka MCVU ka dawa na ka tnat pyniaid kali, jong ka jylla bad na ki District Council ka KHADC bad JHADC ba ki dei ban shimkhia ban pynsangeh ia ka jingkamai beain jong ki kali bar jylla khlem ki kot ki sla kiba biang khamtam ka trading Licence.
Ka MCVU ka dawa ruh ia ki company pynmih dewbilat ba nangne shakhmat ba kim dei shuh ban ai kit mar ia ki kali kiba na bar jylla, hynrei ki dei ban ailad beit ia ki kali jong ki trai ri trai muluk ban kit ia ki Mar, ong ka kyrwoh na U bah H Mukhim President ka Seng.