Dawa ka VPP na ka commission ban pynbeit ia ka kynrum kynram haba iadei bad ka interview kam MPS

Shillong 09 Nailar: Ka seng Voice of The People Party (VPP) ha ka 9 tarik Nailar 2024 ka la phah da ka jingthoh sha u chairman ka MPSC u bah PR.Marwein, ban dawa ba dei ban pynbeit halor ka kynrum kynram kaba mih ha kaba iadei bad ka interview jong ka kam Meghalaya Police Service(MPS)

Ha ka jingiakren bad ki nongthoh khubor, ka seng ka la ong ba ha ka jingshisha dei ban don  42 haduh 43 ngut kiban shah jied ha ka personal interview na ka bynta 17 tylli ki kam ba lait hynrei katkum ka result ba la mih ha ka 25 tarik naitung 2024 la iohi, ba tang kumba 27 ngut kiba shah jied ha ka personal interview.

Kane ka jingleh ka commission ban pynduna ia ka jingjied ia kiban leit sha ka personal interview  kan long ka jingkylli kaba hakhmat eh namar kam shym la don kano kano ka jingpyntip na ka commission ban pynduna ban jied ia ki nongiakhun ia ka eksamin MPS.

Kumta na ka liang ka seng ka la dawa ba dei ban pynbeit noh ia kane ka jingbakla bad ba dei ban pynsangeh shwa ia ka interview haduh ban da pynbeit ia kane.