Shillong:Ki nongialam ka United Democratic Party (UDP), mynhynnin ka sngi ki la buh ia ka jingdawa na ki nong ialam ka Bharatiya Janata Party (BJP) bad kumjuh na u nong ialam ka Meghalaya Democratic Alliance (MDA) u Conrad k Sangma ba ki dei ban shim ia ka rai ban pynshitom ia u MLA ka BJP u Sanbor Shullai.
Kane ka jing dawa na ka liang ki nongialam ka UDP ka long na ka daw ba u MLA ka BJP u bah Sanbor Shullai, hyn nin ka sngi, ha ka jingialang ba la pynlong da ka party BJP ha Umiam, u la knieh ktien haba u Lamphrang ka ingdorbar u bah Metbah Lyngdoh bad hadien ba na ka liang ki nongialam ka UDP ki la tip ia kane ka khubor mynta ka sngi, ki la lum ia ka jingialang ba kyrkieh ban ia kren halor kane ka jingjia.
Haba ia kren bad ki lad pathai khubor, na ka liang u General Secretary ka UDP u bah Jemino Mawthoh u la ong “Hynnin ka presidential election Commitee jong ka BJP ka la pynlong ia ka jingialang ban pan jingkyrshan na ka bynta ka kyrtong ka ban ia khun ia ka election President ka ban long ha ka 18 tarik mynta u bnai, ha kaba ha kane ka jingialang la khot sngewbha ia baroh ki MLA ki nongialam ki party baroh”.
“Ha kaba na ka liang u President jong ngi, u la ai jingkren halor ka jingpynrung ia ka ktien khasi garo hapoh ka 8th schedule, ka jingshah nion bein ki minority Kristan ha ka Ri baroh kawei bad kynsan u MLA ka BJP u bah Sanbor Shullai u la ieng na jaka shong bad knieh ktien ia ka jingkren u Lamphrang ka ing dorbar”u la bynrap.
U bah Mawthoh u la ong “Ia kane ka jingjia ngi sngew ba ka dei kum ka insult pyrshah ia u nongialam jong ngi, u ba dei ruh u Lamphang jong ka ingdorbar thawain ha ka jylla, namar kane ka jingjia ka la jia hakhmat ki union minister hakhmat ka kyrtong jong ka President bad ka long ka jingjia ba jah burom na ka bynta ka jylla hi baroh kawei”.
“Ngi da sngewsih bad sngewkhia shi katdei eh ia kane ka jingjia bad ngi dawa na ki nongialam ka BJP bad kumjuh na u nongialam ka sorkar MDA ba ki dei ban shim kano ka o ka sienjam ban pynshitom ia u bah Sanbor Shullai”u la bynrap.
“Ka BJP ka dei ban shim ia ka jingkitkhlieh, halor kane ka jingleh khlem akor jong u bah Shullai namar ba ka dei ma ka, kaba la khot sngewbha ia ngi bad ban khot iano iano bad ban shu insult na ka liang jong ngi ngim lah ban pdiang ia kane” u la iathuh.
Haba kylli u la ong “Ngin ieh ha ki nongialam ka BJP bad ha u Myntri rangbah ka jylla kumno kin pynshitom ia u bah Sanbor Shullai bad na ka liang jong ngi ngi khlem ia kren ban phah weng noh ia ka party BJP na ka sorkar MDA”.
Ka jinglong sarong u bah Sanbor khlem sngewthuh shuh ia la ka burom kum u Minister ka sorkar bad kum u dkhot ba la slem ka BJP. U long u nongkhot bad u nongbeh ha ka juh ka por.