Shillong: Ka Synjuk ki Rangbah Shnong ka thain Umtyrnga Ri-Bhoi district, ka la dawa ba ka la donkam kyrkieh ia ka sorkar jylla, ka bor synshar district, ka bor Hima Mylliem, ka raid Marwet ba kin wan ban jurip lang ia ka jingthmu ban die jaka sha ki shipai BSF ha ka thain Umtyrnga ryng kat ka jingsakhi lang ki paidbah nongshong shnong jong ki shnong baroh ban iashai kdar halor kane ka kam.
Haba kren sha ki lad pathai khubor myn hynnin ka sngi, u bah Markus Lapasam u nongkitkam ka shnong Umtyrnga bad kiwei ki riew rangbah na ki shnong bapher bapher kiba shah ktah na kane ka jingthmu die jaka sha ki BSF, u la pynrem jur ia ka jingleh jong ka Hima Mylliem bad ka Syiem Raid Marwet kaba la pynlong ia uwei u briew ban kam ia ka jaka kaba heh haduh 12 hajar akar.
U la kynnoh ba u Munu Arengh u la die ia katei ka jaka ba heh 12 hajar akar ym tang 7413 akar sha u Deilang Chirup Law ha ka dor 78 klur.
U bah Markus u buh jingkylli, “Hato u Deilang Chirup Law u lah ban rejister ia ka jaka khlem ka NoC na ka Hima, Raid, ka dorbar shnong”.
U la ong ba katkum ka jingkren ka jingdie jaka ka long 7413 akar hynrei haba ioh ia ka jingthoh ka long haduh 12 hajar akar ban die sha ki BSF.
U la ong lada ailad ban die ia kane ka jaka, ki paidbah da ki phew shnong kum ka Piilingku A, Pillingku B, Umtyrnga, bad kiwei kin kylla phetwir lut kiba rep ba riang, kiba kamai jakpoh.
U bah Markus u la ong ba ki paidbah kine ki phew shnong ki pyrshah jur ia kane, kaba la shu leh sopsop bad thombor.
“Ngi dawa ba ka bor sorkar jylla, ka bor synshar district, ka bor Hima Mylliem bad ka bor Raid ban tuklar ia kane da kaba wan jurip mardor sha katei ka jaka ryngkat ka jingsakhi ki paidbah nongshong shnong baroh”, u la ong.
U la kynnoh ruh ba kiba kyrshan ban die ia katei ka jaka ki dei tang kito kiba don kumba 52 ngut eiei.
Phi don ban ong eiei?