Dawa ka seng ki nongai dawai kynbat ban ithuh ka JHADC

Shillong,9 Nohprah:
Ka Jaintia Indigenous Medicine Association ka seng jong ki nongai dawai kynbat ha Ri Lum Jaintia ka la dawa ba ka Jaintia hills Autonomous District council ka dei ban ithuh noh ia ka rukom ai dawai jong ki . Katei ka seng kaba don kumba 40 ngut eiei ki dkhot hapoh ka jingialam u President jong ka u Dr C.H. Pakyntein ka la bynniaw ia ka jingbym don ki nongiarap ia ki nongai dawai kynbat na ka liang ka sorkar ne ka District Council. Ka la pynpaw ruh ka jingsngewsih namara ki jingduh jait ki kynbat kiba la long la kumno kumno kumba 50 na ka shispah namar ka jingpynjot dusmon ia ka khlaw ka btap.
U President jong ka JIMA uba la pynkup kyrdan Doctor daka Martin Luther Christian University (MLCU) ula ong shuh shuh ba naka liang ka seng kala don ka jingpyrshang ban iatreilang bad ki samla pule haka lain Pharmacognosy kiba don mynta napdeng jong ki; kiba wad bniah (research) iaki kynja jingthung kiba ngi pyndonkam ban shna dawai. Kane ka seng ki nongai dawai tynrai kaba don palat 40 ngut ki dkhot kala rai ruh ban trei shitom ban nangpynbha bad pynroi iaka rukom ai dawai Pnar.
Ia kane u Dr Pakyntein ula kren haka jingialang ban plie iaka jingpyninam bad ka jingaidawai kynbad Khasi Pnar kaba la pynlong daka Meghalaya Awareness Society for Communication (MASCOM) ha ryngkat ka jingkyrshan jong ka Office u Deputy Commissioner, West Jaintia Hills District, Meghalaya.
Ia kane ka jingpyninam iaki dawai dashin bad ki rukom ai dawai kynbat Khasi Pnar la plie pyndon burom da u ma MB Rymbai uba long u Chief Executive Member jong ka Jaintia Hills Autonomous District Council, Jowai. U ma Rymbai ula kular ban shimkhia ia ki jingeh jong ki nongai dawai Pnar lada u wan biang haka bor hadien jong ka ilekshon MDC kaban sa wan. Nalor ki nongai dawai Khasi Pnar; ka Social Forestry jong ka Forest Department West Jaintia Hills District ruh kala wan ban iashim bynta ha kane ka jingpyni nam.