Dawa ka seng Congress, ban mait kyrteng noh ia ki 12ngut ki MLA

Shillong:Myn hynnin ka sngi na ka liang ki MLA,ki MDC ka Congress party ha ryngkat u President ka MPCC u bah Vincent H Pala, ki la wan ban ia kynduh ia u Lamphang ka ingdorbar thawain jong ka jylla u bah Metbah Lyngdoh ban buh da ka dorkhas, ban dawa ban mait kyrteng noh ia 12ngut ki MLA, kyntiap seng, kum ki MLA ka ingdorbar thaw ain ha ka jylla.

Haba ia kren bad ki lad pathai khubor, na ka liang ka Working President ka party Congress ka Dr Ampareen Lyngdoh ka la iathuh ba ka jingwan jong ki ban ia kynduh ia u lamphang ka ingdorbar ka long ban pan jingshai ba halor ka jingmih noh jong ki 12 ngut ki MLA na ka seng Congress, kaba long pyrshah kat kum ka 10th Schedule.

Ka Dr Ampareen ka la ong ba ka party All India TrinaMool Congress (AITMC) ka dei ka party ka bym don ha ka jylla ha ka ba kam don ia u President,ki dhot bad wat ka address jong ka ruh kam don ha ka jylla.
“Ka party kaba la seng kyrkieh da ki 12 ngut ki phetwir ha ka ba ngim tip kumno ba ngin phah ia ki kot ki sla jong ngi,kumta ngi la rai beit na ka party ba kin wan ban ujor da ka petition pyrshah ia kine ki ba la mih na ka party”ka la ong.

Ka Dr Ampareen ka la ong “Haba phi kwah ban mih na ka seng ka don ka lynti kaba shai ha ka kan long da ka ba iaid beit na khmat jingkhang bad ban rung beit na khmat jingkhang bah jong ka no kano ka political party”. Ka la buh ruh ia ka jingkylli “Balei ba kim shuh resign beit bad ba kin ia khun biang ia ka election ban shim ia ka jingkyrshan u paidbah”.
Ka la ong ruh “Haba ki leit sha ka election 2018 ki la wan ban pan ia ka tiket ban ia khun ia ka election na ka seng Congress,bad ngi dei ban peit ba balei yn shah ia kine ba kin rung kat ba mon bad ba kin mih kat ba mon namar ba hangne ym tang ba ki la mih na ka seng Congress, hynrei ki la pynsngewsih ki la pynmong ia ki nongkyrshan ki ba bun jong ngi”.
“Ka jing dawa ia ka jingdon 2/3 ka long ka bym don nongrim, namar ba shaei kin ia leit, ka 2/3 jong ki block jong phi ki la ioh jingtip bad ki la ai jingbit ba phin leit pyniasoh bad kawei ka party ladon ka jing iasoi hato phi leit marwei ban ia kren ia kane ka kam”ka la buh ia ka jingkylli.

“Haba ong ia ka 2/3 kaba baroh ki dorbar thawain kiba ha khlieh tam jong ka dorbar India ki la iapeit hynrei hangne ngi la iohi ba ka don kata ka jingshisha ba ngi dang lah ban buh jingkylli bad ban kyrpad ia u Lamphang ba dang donkam ban mait kyrteng ia kine kum ki MLA namar ba kat ka jingpeit jong ngi,ka jingmih jong ki, ha ka nongrim jong ka ta ka 2/3 kat kum ka 10th schedule ka dang don ka jingduna ki ba bun ki liang”la bynrap ka kong Ampareen.
Ka Dr Lyngdoh ka la ong ruh ba ka jingujor jong ki, ka long ruh halor kat kum ka paragraph jong ka 10th Schedule ka ba ong ba don ki kyndon kiba ong ba shuwa ba kin khreh ban kyntiap sha ka wei pat ka seng, ki don ki kyndon ki ba phi hap ban pynkhreh, “Ka jingkylli hangne ka long ba baroh kito ki kyndon kat kum ka 10th Schedule hato ki ne ki 12 ngut ki la pynbit pynbiang ne em shu wa ba kin mih”.

“Kat kum ka jinglap jong ngi ngi iohi ba bun na ki kyndon ha ki 10th Schedule ki ba lehse kine ki 12 ngut ki khlem buh jingmut ki khlem puson, ha kaba ki mut ba la mon ban mih 12 ngut ia mih beit na ki number ba don ha ka party jong ngi”ka la bynrap.
“Halor kane ngi la wanrah lyngba ka petition ha kaba ngi la don ia ki nongiasaid ain kiba la pynshai ba ngi don ia ka nongrim ba ngin leit ujor ia kane petition, ka seng Congress ka dei ban ieng ban kylli ia kine ki rangbah ki ba shu ia leit khlem da don kano kano ka jingpyrkhat lem ia kata ka jingshaniah jong ngi ha ki bad lada ngi kum ka party ngi la duh ia ka jingshaniah ha ki hato ki paidbah kin ym long kumba long mangi”la ong ka Dr Ampareen.
Ha kane ka bynta haba don ka lynti kat kum ki ain ki kanun kat kum ka jingpyniaid jong ka Constituetion jong ka Ri ha ka ne ka jylla ngi dei ban peit kumno ngi lah ban peit ba kin kin shah mait kyrteng noh kum ki MLA jong ki 12 tylli ki constituency, la ong ka kong Lyngdoh.