Nongpoh: Ka Ri Bhoi Students Union (RBSU), Sengkmie, ka la dawa na ka sorkar bad kumjuh ia ki bor District ka Ri Bhoi ba kin shimkhia, ha ka ban iakren sha ki heh ka National Highway Authority of India (NHAI), na ka bynta ban kyntu ia ki ba ki dei ban pynkhuid bad maramot kham kloi ia kito ki jaka ba la sniew hapoh ka surokbah NH-6 ha Ri Bhoi, kaba la shah ktah na ki jingjia twa khyndew ha kiba bun tylli ki jaka.
U Bah Amberlight Masharing, Working President ka RBSU, u la ong ba ka seng kam banse ban kren halor ka jingeh ki paidbah, namar ka seng ka la lap ba bun ki jaka hapoh ka surokbah NH-6, ki la sdang ban sniew bad khamtam eh ha kito ki jaka ba ka jia ki jingtwa khyndew, ha kaba la wanrah jingeh bad pynthud shikatdei eh ia ki paidbah nongleit nongwan.
Namarkata, kumba ka NHAI ka iai bteng ha ka ban lum khajna na ki paidbah ba iaid lyngba ka surokbah NH-6 ha Ri Bhoi, kumta ka seng ka kyntu ia ka sorkar ba kan kan shim khia, ha ka ban iakren bad ki briew ka NHAI, na ka bynta ban pynsted ban maramot ia ki bynta ban sniew bad twa khyndew, khnang ba kan pynsuk bad ban leit jingma na bynta ki paidbah kiba iaid ba ieng lyngba katei ka surok, u la bynrap.
Phi don ban ong eiei?