Dawa ka LKBAJAC, ban sangeh mardor ia ka kam shna surok ha Lapangap

Jowai:Ka Joint Action Committee, kaba la tip kum ka Lapangap Khanduli Border Area Joint Action Committe (LKBAJAC), mynhynnin ka sngi ka la leit ban ia kynduh ia u Deputy Commissioner ka West Jaintia HIlls District ban aiti ruh ia ka dorkhas ban dawa ba ka bor District bad ka sorkar jylla ka dei ban phah sangeh mardor ia ka jingwan shna surok ka sorkar Assam shapoh u pud u samka jylla Meghalaya kaba la jia bad dang bteng haduh kine ki sngi na ka shnong Tahpat, Lakeroi bad Lapangap badn pyniasoh bad ka shnong Khanduli.

Ha kane ka sngi Balang ki paidbah ka shnong Lapangap ki la hap ban iamih paidbah ban beh krat ia ki nongtrei surok ka sorkar Assam bad dei halor kane ba ka Joint Action Committee mynta ka sngi la wan ban aiti ia ka dorkhat sha u Deputy Commissioner ka WJH ban dawa ba dei ban phah sangeh noh mardor ia katei ka jingthmu jong ka sorkar Assam.

Ki nongialam ka Joint Action Committee ki la ngeit ba katei ka jingthmu ka sorkar Assam ban shna ia utei u surok kadei ka buit ban klun ei ia ki jaka ki puta ka jylla Meghalaya kiba don ha ki thain khappud.

“Ngi dawa ba ka bor District bad ka sorkar kan shimkhia ban tuklar ban pynsangeh noh shisyndon ia kane ka jingwan shna surok ka sorkar Assam namar ngi sngewthuh shai ba kane kam dei ka jingthmu ban wanrah ia ka roi ka par hynrei kadei ka buit sianti ban ioh klun ei ia ki jaka puta jong ka jylla Meghalaya”, la ong u Chairman ka JAC, u ma Pyrkhatbha Pyrphet.

Haba kren pat sha ki lad pathai khubor na ka liang u ma Garod LSN Dykes uba dei u Deputy Commissioner ka West Jaintia HIlls, u la ong ba ia kane ka surok la dep ban jurip ha u snem 2019 bad na ka liang ka Assam ruh ka la pyntip sha ka bor District bad kane ka dei ka surok kaba rim ym kaba dang tih thymmai. Hadien ka jingjurip ia katei ka surok ha utei u snem, na ka liang ka Border Magistrate ka la bthah ia ki trai jaka ban wanrah ia ki dulir bad ki patta ban pynshisha la ki jaka jong ki ki shah ktah ne em, hynrei na ka liang ki paidbah nongshong shnong katei ka thain kim shym la wan satia.

Halor kane ka JAC ka ieng skhem ba ka sorkar ka dei ban pynsangeh ia kane namar ka long ka bym lah ban long ba ka sorkar Assam kan wan shna surok sha katei ka jaka kaba ym shym la hap satia hapoh ka jingiakhajia lane Dispute Area.