Dawa ka KSU ban tohkit ia ki University

Shillong, 7 Jylliew:
Ka Khasi Students’ Union (KSU) ha kane ka sngi Thohdieng ka la dawa na u Lat ka jylla u Ranjit Shekhar Mooshahary ban bthah ia ka sorkar jylla ban thung ia ka kynhun tohkit ban wad ia ka jingshisha jong baroh ki university kiba don ha kane ka jylla.
Ka KSU ka la iakynduh hynne ia u Lat ka jylla ryngkat bad ki samla pule jong ka CMJ University ha Raj Bhavan.
La donkam ban bishar bniah ia ki skulbah bym dei sorkar kiba don ha kane ka jylla ka long kaba donkam khnang ban tehlakam ia ka jingpyniaid bymman.
U president ka KSU u samla Daniel Khyriem u la ong ba la kyntu ia u Lat ban bthah ia ka sorkar jylla halor ka jingdonkam ban pynlong ia ka jingtohkit ia baroh ki university kiba don ha kane ka jylla.
Halor kane, na ka liang u Lat u la pynthikna ba un peit ia kiba donkam baroh bad kular ba un bishar bniah ban iarap ia ki samla ka CMJ University.
U samla Daniel u la ong ba ka jingmih ka kynrum kynram ha ka CMJ University ka la wanrah ia ka jingjah burom ia ka jylla Meghalaya kaba la ju tip kum ka jaka pule jong ka North East. “Ka jingshaniah ki paidbah ha ki skulbah ha kane ka jylla Meghalaya ka la duh noh”, la ong u president ka KSU.
U la ong ruh ba ka seng kam kwah ban mih shuh shuh ki CMJ university ha kane ka jylla bad ka sorkar jylla ka dei ban leh da kaba tyngeh.
Ha kane ka sngi Balang, u Director ka Higher and Technical Education (DHTE) u la dep bthah ia ki samla pule ka CMJ university ban pynbiang ia ki jingdonkam jongki sha ka ophis u DHTE ha Additional secretariat naduh 7 tarik haduh 17tarik Jylliew na ka bynta ban iarap ia ki ban pynwad klas.