Dawa ka KSU ban tohkit ia 15 tylli ki LP School, ki bym don nonghikai

Nongpoh:Ki nongialam ka KSU North Khasi Hill District Unit, ki la dawa na ka Deputy Commissioner, ba ka dei ban pynlong ia ka jingtohkit kaba bniah halor ka jingbym don nonghikai kiba thikna ha ki 15 tylli ki Lower Primary School, kiba don ha ki shnong bapher bapher hapoh ka District.

Ki 15 tylli skul kiba ka KSU, ki la dawa na ka DC ba ka dei ban pynlong ia ka jingtohkit halor ka jingbym biang ki Nonghikai, ki kynthup ia ka Lower Primary School kaba don ha shnong Nongkhrah, Mawbsein, Ingsaw, Umtasor, Raitong, Nongkya, Mawkba, Lymphuid, Korhadem,Iamkhong, Nongbirlum, Nongsier Jirang, Umkhremdiengkhong, Ranibari bad LP School kaba don ha shnong Pynker ‘B’.

Ha ka shithi jingujor kaba ki la phah sha ka DC, ki nongialam ka KSU ha Ri Bhoi, kiba kynthup ia u Samla Ferdynald Kharkamni bad u Samla Lambok Rymbai, la pynpaw ba ka nongrim kaba la pynlong ia ka KSU ha Ri Bhoi, ba kin dawa na ka DC ba ka dei ban pynlong da ka jingtohkit kaba bniah halor ka jingbym biang Nonghikai ha kitei ki skul, ka dei namar ba ki sngewkhia eh ia ka jingshah ktah ki khynnah skul, kiba thmu ban leit wad jingstad na kiba kum kitei ki skul.

Kitei ki nongialam ka KSU, ki la pynpaw ruh ba ka jingbym biang Nonghikai ha kitei ki skul, ka la wanrah jingeh ia ki khynnah skul bad ki kmie ki kpa kiba phah skul ia ki khun ha kiba kum kitei ki skul, ha kaba na ka liang ki nongialam ka KSU ki sngew, ba ka jingbym biang nonghikai ha ki skulk aba la pynmang kyrpang ia ki khynnah kiba ha ka rta 6 haduh 14 snem, kata katkum ka Right to Education (RTE) 2009, kumjuh ruh katkum ka Article 21 (A) jong ka Constitution jong ka ri India, kaba la kdew shai ba ki khynnah hapoh ka 14 snem, ki lah ban leit sha ki skul khlem da donkam ban siew pisa.

Haba iadei bad katei ka jingbym biang nonghikai ha kitei ki skul ha Ri Bhoi, na ka liang ka KSU ka la dawa na ka DC, ba ka dei ban pynlong ia ka jingtohkit. Ha kajuh ruh ka por ka seng ka byrthen ba lada ka DC kam lah ban ai ia ka jingpynshai kaba paka, ka seng kan sa buddien hi bad ka sa leh ia kaba donkam baroh.