Dawa ka KHNAM, ban pan map U Jitendra Singh

Shillong, 17 Nailar:
“Ngi pynrem jur, ia ka jingthoh lamler jong u myntri ka sorkar pdeng, U Dr Jitendra Singh, ha kaba ula ong ba ia U Syiem Tirot Sing, la phasi da ki phareng” ong ka kyrwoh jong ka Khun Hynniew trep National Awakening Movement.
Katei ka seng, ka ong ba ha ka jingthoh jong U Dr Jitendra ha ka facebook peij jongu, ula ong ba ia U Syiem Tirot Sing, la phasi da ki phareng.
Halor katei ka phang, ka KHNAM, ong shuh shuh ba kane ka pynpaw ba une u myntri ka sorkar pdeng u la wan iuh kjat ha ka shnong ba la kha ia u syiem Tirot Sing, khlem da dong ka jingshemphang shaphang kaei kaba la jia. Ka seng ka pynrem jur ia kane ka jingleh jong une u myntri u ba la pyrshang ban pynthoh bria ia ka histori jong ka jaitbynriew. “Ngim pdiang bad ngim lah ban ailad kum ia kine namar ka lah ban ai mynsiem ia kiwei ki ba dang wan. Ngi dawa ia u Dr Jitendra Sing ba u dei ban pan map lyngba ki lad pathai khubor bad u dei ban pynbeit ia kaei kaba u la kren” pynkut ka kyrwoh na u Bah Thomas Passah, President ka seng samla jong ka KHNAM.