Dawa ka JSU ban pyntrei noh ia ka Jowai Campus

Shillong, 28 Jylliew:
Ka Jaintia Students’ Union lyngba ka RTI ka la lap ba ka NEHU ka la leh klet ia ka Jowai Campus kaba dei ban shan noh ha ka shnong Wahiajer, West Jaintia Hills District. Katkum ka RTI, la pyni ba ia ka jaka la ai sngew bha da ka shnong Wahiajer na ka bynta ban tei ia kane ka Campus bad la dep ruh ban peit bniah bad dep buh ruh ia ki mawpud mawsam bad ka mang tyngka kaba long T.7,12,694 /-.
Shuh shuh lyngba ka RTI la lap ba na ka pisa baroh kaba la mang da ka UGC lyngba ka 12th Plan na ka bynta ban tei ia katei ka Campus la buh 600 lak tyngka ban tei noh ia ka jaka ai jinghikai ha katei ka jaka bad ki tiar ki tar kiba dei ki jingdonkam.
Hynrei kumba ka long haduh mynta na ka liang ka NEHU kam pat lah ban sdang ban shna ia ki jaka pule kaba biang ha Jowai Campus kumba la mang da ka UGC. Na ka liang ka JSU ka dawa na ka NEHU ban sdang noh shi syndon ia ka Jowai Campus namar ka Union hi kam kwah shuh ban iohi ia ka jingran dien ka NEHU kumba la jia ha Moodymmai ha ki snem ba la dep.
Ka JSU ka la rai ruh ba lada ka NEHU kam lah ban sdang ia Jowai Campus ha kine ki khyndiat bnai , kan sa phah jingthoh halor ka jingleh klet ia ka Jowai Campus sha ka Sorkar Kmie kumjuh sha ka Human Resource Development jong ka Sorkar India.