Shillong: Ka Dorbar Shnong Jaiaw Pyllun kala dawa ia ka Sorkar Jylla bad ia ka Meghalaya Energy Corporation Limited (MeECL) ba kan pynsangeh shisyndon ia ka jingthmu pynlip bording biang (load Shedding) bad ka jingpyn treikam ia ka Smart Meter ha Jylla.
Ka Dorbar Shnong Jaiaw Pyllun kaba kynthup ia ki San tylli ki Dobar, ki la shim ia kane ka rai ha ka jingialang ba kyrkieh jong ka Executive Committee ba long hynne ka sngi palei, kaba iatai halor ka jingthmu pynlip bording biang naduh ka 20 tarik Lber namar ka jingshah otbording ha ka NEEPCO.
“Ka Dorbar Shnong Jaiaw Pyllun ka pyrshah jur ia ka jingthmu pynlip bording biang jong ka MeECL bad ngi dawa ia ka Sorkar Jylla ba kan tuklar kloi ia kane” ong u Chairman Bah PD Nongrum bad Secretary Bah S Pariat ha ka kyrwoh.
Kat kum ka jingong jong ki, ka jingthmu pynlip bording biang ha kum kine ki por, kan sa ktah jur bha ia ki samla pule kiban sa iakhun ia ki eksamin bapher bapher naduh ki eksamin SSLC, HSSLC bad kiwei kiwei ki ban sa sdang shen. Ban iaid lait na ka jingpynlip bording, ka Dorbar Shnong kala ai jingmut ia ka MeECL ba kan sangeh noh ia ka jingpynlut ne pynsyrwa kai ia ka pisa ba ioh lum na ki bill bording jong u paidbah kaba kot da ki phew klur tyngka shibnai.
Ha kajuh ka por, kala kyntu ruh ba ka MeECL ba kan pynsangeh shuwa ia ka jingpyntreikam ia ka Smart Meter ne ki project thymmai ba da ki spah klur ha Jylla ia kiba dang lah ban ap, katba kam pat lah ban pynkhuid ia ka ram ba ka pynsah na ka jing thied bording elektrik na ki kompani bapher bapher.
Ka Dorbar Shnong ka la kyntu ruh ba kan pyndonkam hok ia ka song pisa ba ka ioh na ka Sorkar Pdeng nalor ka ram ka shah ba ka shim na ki Bank ha ka ban siew ia ka ram baroh khnang ba ki Nongshongshnong ka Jylla kin lait noh na kum kine ki jingeh ba mynta.
Phi don ban ong eiei?