Mawkyrwat: Ka Joint Action Committee (JAC) ka Aeng synroplang kaba lam khmat da ka seng Hynniewtrep National Achik Council (HANC) ryngkat ki Nongsynshar shnong jong ka thaiñ Mariam, Umdohlun, Wahkaji, Phlangdiloin ter- ter bad thaiñ Warsan Lyngdoh hynnin ka sngi ka 25 tarik ki la ioh ban pynlong ia ka jingialang paidbah ha iew Umdohlun na ka bynta ban ai ka jingkyrshan bad pynsngew paidbah halor ka surok ar lain na Nongstoin sha Ranikor.
U bah Ricky Sohlang, Chairman ka JAC haba ai jingkren ha ka jingialang ha Umdohlun.
Ha kane ka jingialang la wan ban shim bynta lang da ki Sordar ki Myntri shnong jong ki shnong bapher bapher kumjuh ruh ia ki riew rangbah bad ki samla ban ai ka jingkyrshan halor kane ka surok.
Na ka liang u bah Ricky Sohlang, Chairman ka JAC haba ai jingkren u la ong ba kum kine ki jingialang paidbah, ka JAC bunsien ka la ju pynlong ha ki snem ba la dep ha kaba u paidbah hi u la pynkup bor ia ka JAC ba kan iaid khmat ban dawa ia ka hok, namar ka jingsahdien jong ka dong ka thaiñ, u la ong ruh ba haduh kine ki sngi ka JAC kam shongthait ne kynran dien ban ialeh bad man ka sngi ka ju wad ia ki lad ki lynti ban ioh ia kane ka surok bad kata ka dei ka thong jong ka JAC , ong u bah Ricky Sohlang.
U la ong ruh ba kum ki nongialam, haba ki paidbah ki angnud ka seng kan nym shongthait namar ki tip shai ba ka jingdawa ia kane ka surok ka dei ka hok jong u paidbah kaei ba ka sorkar ka la mynjur ban pyntrei ia kane ka surok bad la dawa ia kata khlem sngew pyrshah iano iano ruh. La ong shuh shuh, ba ka jing pyrshah jong ki katto katne ka dei ba ki sngewthuh bakla ia kaei kaba ka sorkar ka thmu, namar na ka liang ka sorkar hi ka la pynshai ba kam don eiei bad ka jingtih uranium, hynrei ka jingthmu jong ka surok ba ka long beit na ka bynta ka jingmyntoi u paidbah, ia u duk u suk jong ka dong ka thain.
Shuh shuh u ne u nongialam u la ong ruh ba katba ka iiing bishar kam pat lah ban rai halor kane ka surok na ka liang ka JAC kan nang iai pynlong ia ki jingialang paidbah ban pynsngew bad ban dawa sha ka sorkar ba ka dei ban pynlong da ka jingialang paidbah, ban pynshisha ba hato u paidbah u jong ka dong ka thain u kyrshan ne pyrshah ia kane ka surok.
Na ka liang ka JAC ka dawa ia ka sorkar ba ka dei ban pynlong da ka dorbar bah, hapoh ka shi bnai bad nangne sha khmat ka seng kan nym shongthait kan nang iai pynlong ia ki jingialang, kumta ka seng ka khot ka wer ia ki paidbah bad ki nongialam shnong jong ka dong ka thaiñ bad kin ai ka jingkyrshan haduh ban da ioh ia kane ka surok.