Dawa ka HYC Sengkmie ban pyn kylla ia ka kyrteng Meghalaya sha ka “Hynniewtrep & Garo land”

Shillong: Ia ka Jylla jong ngi la sin da ka kyrteng Meghalaya da uwei u Bengali.

Kane ka jingai kyrteng tang da kaba pynshong nongrim tang ia u Lyoh kam dei kaba shongnia bad shong nongrim. La long kumba ym tip ia ki Trai muluk bashong ha ka, sngew kumba ym don trai Ri bad kam pynpaw ia ka jinglong kyrpang ki Trai muluk trai ri ha kane ka jylla.

Ia ki wei ki Jylla ha India la ai kyrteng ha ki kyrteng ki Trai muluk , nuksa Punjab namar kadei ka Jylla ba long trai muluk ki Punjabi, Mizoram namar ka dei jong ki Mizo, Manipur namar ka dei jong ki Manipuri , Nagaland ka dei jong ki Naga bad kumta ter ter.

Ha ka Jylla Meghalaya ki Trai muluk bad ki Trai Ri dei ki Hynniewtrep ha Khasi & Jaintia Hills bad ki Garo ha Garo Hilsl. Ym dei ki Bengali ne ki Bangladeshi ne kiwei. Ha Khasi- Jaintia Hills bad ha Garo Hills nalor u lyoh, don shibun kiei kiei ki bapaw, ngi don ki lum, ki wah, ki jingkieng jri, ki madan phlang, u slap ba jur, ki kshaid, ki thwei bad kiwei, hato yn iahap ban shu ai kyrteng tang ha uta u lyoh? Kumta ia ka Jylla jong ngi kaba dei ka Jylla jong ki Hynniewtrep ha Khasi – Jaintia Hills bad jong ki Garo ha Garo Hills, ladei ban ai kyrteng noh da ka ” Hynniewtrep & Garo Land ” bad kane kan pynpaw shynna sha ka pyrthei ba dei ma ngi ki Trai muluk kiba long ki Trai bad ki nongsynshar ia ka Jylla ha ka jingstad bad ka jinglah jong ngi hi. Kiwei ki poiwir kim don kam ban tuklar ne balain stad ia ka Jylla jong ngi. Kan pynneh pynsah ruh ia ka sap kyrpang jong ngi ki Trai muluk.

Ha kaba iadei bad kane, na ka liang ka HYC, Sengkmie ka la buh ia ka jingdawa na baroh ki 60 ngut ki MLA ba ka dei ban pass noh da ka official resolution ha ka ingdorbar thawain ha ka sien shong ka ban wan ban dawa na ka Sorkar-kmie ban pynkylla ia ka kyrteng ka Jylla jong ngi sha ka Hynniewtrep & Garo Land.