Dawa ka HYC ia ka NHAI, ban pynbha mardor ia ka surok ba sniew ha Umdihar

Nongpoh: Ka seng HYC Nongpoh Circle, ka la dawa ïa ka National Highway Authority of India (NHAI), ba ka dei ban maramot noh mardor ia kawei ka bynta ba sniew eh jong ka surokbah NH-6 bad kaba hap hapoh ka shnong Umdihar markhap bad ka shnong Dulongnar.

Haba ïadei bad ka jingsniew katei ka surok, u Bah Tony Shylla, President ka HYC Nongpoh Circle, u la ong ba ka jingsniew ka surok ha katei ka jaka, ka la don bynta la bun bun bnai bad kaba la pynjynjar ia ka leit ka wan ki kali bad hapoh katei ka jaka, bunsien la ju jia ki jingjia aksiden bad khamtam eh ia ki nongniah kali ki bym pat tip bha ia katei ka jaka.

U la ong ruh, ba ka seng nalor ba ka la ju lap ia ki jingjia aksiden ha katei ka jaka, sa mynta ka sngi, ki la lap ba kawei ka kali tourist kaba kamai Shillong Guwahati, ka la sniew noh ha katei ka jaka ba sniew ka surok bad kaba la wanrah noh ia ka jingsahkut kali bad kaba la pynthut ha ka leit ka wan ki paidbah.

Namarkata, na ka liang ka seng ka kyntu ia ki bor ka NHAI ba kin weng mordor, ia ki khyndew ki shyiap ki mawria kiba la lum thup ha katei na sniew ka surok, namar ka la pynthut ha ha ka leit ka wan ki paidbah bad kaba buh jingma eh ia ki nongniah kali, khamtam eh ha ka por mynmiet bad ki bym pat tip ia ka jinglong jingman hapoh katei ka surok.