Dawa ka HFU na ka sorkar ban pyllait noh ia ki ba shah kem halor ka jing pyniap iaka dngiem

Shillong: Ki nongialam ka seng ki nongrep kata ka Hills Farmers Union (HFU) haka jing ialam da u president u bah Commander Shangpliang bad u general secretary u bah Alfonbirth Kharsyntiew kila thoh sha u Principal Secretary ka tnat khlaw ka jylla ban dawa naka sorkar baka dei ban pyllait noh iaki ba shah kem halor ka jing pyniap iaka dngiem.

Ka HFU kala pynpaw sha ka sorkar ba bun ki nongrep khamtam kiba ri ngap hapoh ka thain Mawpyrthuh ka thain Pynursla, ki la duh nong bha namar ka jing wan pynjulor ki mrad khlaw iaki jaka rep bad kumjuh ruh iaki jing ri jong ki paidbah.

Ka seng ka la pynpaw ruh ba ki mrad khlaw kila pynjulor haduh 500 tylli ki sem ri ngap kiba shong dor haduh 10 lak tyngka hapoh ka thain Pynursla. Namar kane ka HFU, ka kyntu ruh ia ka sorkar ban siew ia ka bai lutskan sha ki paidbah kiba la duh noh iaki lad kamai namar ka jing wan pynjulor ki mrad khlaw.

Ka HFU ka lyngba ka shithi ka pynpaw ruh sha ka sorkar ba ka seng ka kloi ban ia treilang bad ka sorkar na ka bynta ban ai jing hikai bad pynsngewthuh ‘Awareness’ sha ki paidbah halor ka jing donkam ban pynneh iaki mrad khlaw bad ka mariang.