Dawa ka FKJGP, ban mih noh U Director Printing Stationery na ophis, kynnoh ba pyndonkam bakla T.2klur

Shillong: Ka seng Federation of Khasi Jaiñtia and Garo People (FKJGP) mynta ka sngi ka 11 tarik ha ka nohphai sngi, ka la leit rung sha kamra treikam u Director ka tnat Directorate of Printing and Stationery ban dawa ia u ban mih na kane ka ophis, ryngkat bad ka jingkynnoh pyndonkam bakla ïa ka pisa kaba la kot haduh T. 2 klur tam.

U nongialam ka FKJGP u bah Reginald Thabah, ula ong ba kane ka jingwan rung kynsan ki dkhot ka seng, ka dei ruh hadien ba ka seng ka la phah shithi ban dawa na u myntri rangbah ka jylla ban wengkam noh ia u Salgira R Marak hapoh 10 sngi.

U bah Reginald, ula ong ba kane ka jingdawa wengkam ia une u Director, ka dei ruh hadien ka jinglap u bah Egenstar Kurkalang lyngba ka RTI ba la pyndonkam bakla haduh T. 2 klur.

Ka seng ka la ai por 10 sngi ia ka sorkar ban wengkam ia une u Director, hynrei namar ka jingbym sngap ka sorkar ka seng ka la shim ia kane ka sienjam ban wan beh ia une u Director na kane ka kamra treikam.