Nongpoh: U Bah Shining Kyntla, President ka CoRP Central Zone, u la ong ba ka seng ka dawa na ka tnat MeECL bad ia ka sorkar, ba kim dei ban pynlip bording ha ki naduh ka por 7 baje haduh 10 baje mynmiet, ha kiba bun ki shnong kiba hap hapoh ka Raid Myrdon, da kaba ong ba kitei ki kynta ba pynlip bording ka MeECL, namar ki paidbah ha katei ka thain ki donkam palat ia ka bording ha kitei ki kynta.
Utei u nongialam ka CoRP, u la ong ruh ba lada ka MeECL ka donkam eh ban pynlip bording, ki la dei ban pynlip ha ka por mynsngi, hynrei lada ki pynlip ha kitei ki kynta, ka ktah eh ia ki paidbah bad khamtam ha kaba kum kane ka por ba ki don shibun ki samla pule, kiba donkam ban pule kot, na ka bynta ban pynkhreh ia ka Selection ban ioh thoh ia ka SSLC.
Shuh shuh, u la ong ba ka nongrim kaba la pynlong ia ka seng ba kan buh ia katei ka jingdawa sha ka MeECL, ka dei hadien ba ki la ioh ia shibun ki jingujor na ki paidbah jong katei ka thain, kiba la pynpaw ia ka jingsngewkhia ba jur ia katei ka jingpynlip bording ka MeECL, da kaba pynpaw ba ki dei ki kynta ba ki paidbah ki donkam bording.
Namarkata, na ka liang ka seng ka dawa na ka tnat MeECL ba ki dei ban sngap ia ka jingdawa jong ka seng bad khamtam eh na ki paidbah kiba sah ha ki bun tylli ki shnong kiba don hapoh ka Raid Myrdon.
Phi don ban ong eiei?