Dawa ka AAP na u CEC ban mait kyrteng ia 18 ngut ki MLA

Shillong,26 Naitung:
Ka Aam Aadmi Party ( AAP) na kane ka jylla ka la phah jingthoh sha u Chief Election Commissioner ka ri India, ba u dei ban mait kyrteng noh ia ki 18 ngut ki MLA ka Meghalaya kiba bat ia ka kam Parliamentary Secretary. Ka kyrwoh khubor na u General Secretary katei ka seng u ba Wonder Lapang, u la ong ba ka jingbat ka mar maloi kitei ki 18 ngut ki MLA ka long pyrshah ia ka Article 191 (1)(a) jong ka riti synshar ka ri.
U la ong ruh ba katei ka jingthungkam ka sorkar Congress ka dei tang ka jingpynsyrwa kai ia ka pisa paidbah namar ba ia ka tulop jong ki ka sorkar hap siew tam, sa ia ka tulop Parliamentary Secretary ryngkat kiwei pat ki jingmyntoi kum ki kali sorkar, ki jaka sah,ki bor pahara bad ki don ka juh ka kyrdan kum ki myntri sorkar.
Utei u nongialam katei ka seng u la ong ba kat shaba phai haba ki paidbah ki ud ka jubab ba ioh na ka sorkar ka long bym don pisa, katba ia ka pisa pat ki shu pynsyrwa kai da katei ka rukom. Ula ong ruh ba katkum ka Article 191 (1)(a)ka kren shai ba uno uno u MLA um lah ban bat ar kam ne ka jingmyntoi ha ka jingioh nong bad katei ka jingleh ka sorkar Congress ka dei ka jingpynkhein ia ka riti synshar.
Lah ban pynkynmaw ba u Chief Election Commissioner (CEC) ka ri India u dang pynkhreh ban mait kyrteng ia ki 21 ngut ki MLA ka AAP ha Delhi kiba ka sorkar AAP ka thun gkum ki Parliamentary Secretary khlem da ai jingmyntoi eiei ia ki , katei ka seng ka dawa ba lada mait kyrteng ia ki 21 ngut ki MLA jong ka ka dei hok ruh ban mait kyrteng ia ki 18 ngut ki MLA Congress khnang ba kan ym long kaba shah shiliang.