Shillong: Ka kynhun ki 7 ngut ki MLA ka United Progressive Front (UPF) kila kyntait ia ka rai ka sorkar pdeng ban pynlait ia ka Citizenship Amendment Bill (CAB) tang ha ki jaka ba hap ha ka sixth schedule ha ka jylla bad kila dawa ba ka sorkar pdeng ka dei ban ai da ka Inner Line Permit (ILP).
Ki nongialam ka kynhun kynthup bah Banteidor Lyngdoh, bah Hamlet Dohling kiba dei ki myntri, u Saleng A Sangma kila ong ba lada ka sorkar pdeng ka ai ILP ia ka Manipur, ka jylla Meghalaya lei ka dei kaba la dawa ia ka la slem.
“Ngin iakren ia u myntri rangbah ban leit iakynduh biang ia u Amit Shah uba dei u myntri kam pohiing ka ri, ban dawa ia ka ILP ha ka jylla”, la ong kine ki MLA ka UPF.
U bah Hamlet uba dei u myntri ka sorkar MDA, ula ong ba ki la iakren ha ka cabinet ban pan ILP ha ka jylla ha kaba ka cabinet ruh kaba u myntri rangbah ruh ula ong ba ka donkam ki lad ki lynti ban iada ia ka jingwan rung ki briew nabar.
“Ngi sngewkhia ba ka CAB kan treikam lait noh na ka sixth schedule. Ka UPF ka pyrshah ia ka Citizenship Amendment Bill (CAB). Ngim hun ia ka rai ban pyllait ia ka CAB tang ha ki sixth scheduled. Ngi kwah ban pynshai ba ngi pyrshah ia ka CAB ban pyntreikam ha ka jylla”, la ong bah Banteidor.
Katba u bah Hamlet ula ong ba, “Ngi la iakren ha ka cabinet ban ai da ka ILP kumba ioh ka Manipur”.
U bah Banteidor ula ong ba ka ordinance ka MRSSA ruh, ym pat ioh ia ka jingmynjur bad la donkam ban ai da ka ILP kaba la don lypa.
Phi don ban ong eiei?