Dawa hospital 100 jingthiah ka FKJGP ha Mawlai

Shillong, 17 Jymmang:
Ka Federation of Khasi Jaintia & Garo People (FKJGP), Mawlai circle ka la dawa ban wanrah noh da ka hospital ba 100 jingthiah sha ka thain Mawlai. Ia kane ka FKJGP Mawlai Circle ka la buh hakhmat na u Myntri ka koit ka khiah jong ka sorkar Jylla, u Bah Alexzander L. Hek dang shen ha ka jingialang ha Mawlai.
Ka FKJGP Mawlai circle ka la kam ba lada lah ban wanrah ia kane ka hospital kan ai jingmyntoi ia ki paidbah ka thain khamtam na ka
bynta jong u kup shiliang sem shiliang.
Ka seng ka la dawa ruh na u Myntri ka koit ka khiah ban pyntreikam ia ka Meghalaya Health Insurance Scheme (MHIS) namar ba kan long ka jingmyntoi khamtam ia kito longing longsem kiba duk ba suk ha Mawlai.
Ha kawei ka liang ka FKJGP Mawlai circle ka la dawa ba dei ban pynbiang noh ia ka jingdonkam jong ka CHC ha Mawlai Mawiong namar ba kam pat don ki tiar ki tar ki ba biang ban ai ia ka jingsumar ia ki nongpang. Katkum ka jingong ka FKJGP Mawlai katei ka jaka sumar ka donkam ban buh ia ka X-Ray Machine, Endoscopy Machine, Scanning Machine, Ultrasound bad kumta ter ter.
Donkam ruh ia ka jaka ban sumar bniat bad ban phah doktor shuh nalor ki doktor ba la don lypa ha katei ka CHC.
Dei ban kyntiew kyrdan noh ia ka PHC Mawlai Mawroh ba mynta sha ka CHC bad donkam ia ki nos bad ki doktor khnang ba PHC kan treikam ha ka rukom ka ba dei na ka bynta ka jingkoit jingkhiah jong ki briew ka Mawlai circle.