Dawa hiar shuki ki samla pule ia U Dr. RC Laloo

Jowai, 9 Naiwieng:
Ki samla pule ka Kiang Nangbah Government College hapoh ka lama jong ka Kiang Nangbah Government College Students’ Union (KNGCSU) ki la pynlong ia ka jingiakhih kaba kyndit halor ka jingleh mynthi ka sorkar ia ki mat dawa jong ki.
Ha ka jingshisha, ki nongialam ka KNGCSU ki la dep ban pynbna ia ki program iakhih jong ki naduh ka 11 tarik une u bnai, hynrei ki la pyn thame ia ki bor District da kaba ki la pynlong ia ka jingiakhih kaba kyndit mynta ka sngi.
Ia kane ka jing iakhih jong ki samla pule ka Kiang Nangbah Government College, ki Seng bhalang kiba kynthup ia ka Jaiñtia Students’ Union, ka Jaiñtia Youth Federation, ka Khasi Students Union (Jaiñtia Hills Unit) bad ka NWYF ki la ai ka jingkyrshan ia ka KNGCSU.
Kum ban shu pynkynmaw, ka KNGCSU ka la dawa na ka sorkar halor ki 5 tylli ki mat kiba kynthup ia ka ban thung nonghikai na ka bynta ka Mornig Section ban pynheh ia ki karma class, ban plie noh ia ka Girls’ Hostel bad ban siew tulop ia ki katto katne ki nongtrei ki bym shym la ioh tulop la 11 bnai mynta.Kawei pat ka jingdawa ka long ban pynbha ia ka surok ban rung shapoh katei ka College.Na ka liang ki nongialam ki samla pule katei ka College, ki la ong ba lashai ka sngi kin pynlong ia ka jingiaiaid paidbah naduh katei ka jaka pule shaduh sha DC office kum ka dak ban pyrshah ia ka jingsngap mynthi ka sorkar ia ki mat dawa jong ka KNGCSU.Ki la khot la wer ruh ia ki paidbah, ki sengbhalang ban ia snohkti lang bad ka KNGCSU ha katei ka jingiaiaid paidbah.Ki samla pule hynne dang step ki la khang tala lut ia baroh ki jaka rung sha katei ka college bad dei hadien ba ki samla pule ki la mih noh na phyllaw katei ka jaka pule, la wan ki Magistor bad ki pulit ban pynpait ia kitei ki tala.Ki samla pule ki la pynpaw ruh ia ka jingbitar jong ki ia u Minister ba dei peit ia ka pule dangle, u Dr. RC Laloo.“Lada u myntri um lah ban pynurlong ia ki jingdawa jong ngi ki samla pule, ngi dawa ba u dei ban hiar shuki noh”, la pynpaw ki samla pule.
Na ka liang ki pulit ki la ong ba ki la long kiba la pynkhreh ban khanglad ia ki samla pule ban tur sha Office u Deputy Commissioner lashai ka sngi ba-ar.