Dawa dorbar kyrpang u MLA ka North Shillong halor ka PO ki riewlum

Shillong: U MLA ka North Shillong u bah Adelbert Nongrum, u la dawa ba ka sorkar ka dei ban khot ia ka dorbar kaba kyrpang ban ia kren halor ka Presidential Order (PO) 1950 kaba la kynthup haduh 53 tylli ki jaidbyriew riewlum ha kane ka jylla Meghalaya ha ka por ba ioh la ka jong ka jylla.

Kumba ka long ka jylla Meghalaya kala shu shim na ka jylla Assam ha ka por ba ioh ia la ka jong ka jylla, kane ka jingleh kala ktah ia ka jylla ha kiba bun ki liang, u la kyntu ia baroh ki seng sain pyrthei ban ai lang iaka jingkyrshan ha kane ka jingdawa ban pynthymmai ki riewlum kiba don ha kane ka jylla Meghalaya.

Haba kren sha ki lad pathai khubor ha ka sngi Saitjain, u bah Adelbert u la ong ba ha ka por ba ioh la ka jong ka jylla la shu shim ia baroh ki riewlum katkum ka presidential order 1950 kaba kyntup ia ki 53 tylli ki jaidbynriew riewlum kiba dei jong ka thain shatei lam mihngi jong ka Ri India bad kane ka la buh ka jingma ia ka jylla namar ba ka la ithuh ia ki kum ki riewlum ha kane ka jylla katba ki briew na kane ka jylla kim ioh satia ka jingithuh sha kiwei ki jylla.
U bah Adelbert u la ong, “Lada ka jylla Sikkim, Nagaland, Arunachal Pradesh ki lah ban pynbeit ia ka jingdon ki riewlum ha ka jylla jong ki, lada kiwei ki lah balei ka jylla Meghalaya kan nym lah”.
U la ong ba ka sorkar jylla ka don ia ka bynta ban thaw ia ki kyndon.
U MLA ka North Shillong u la ong ba katkum ka thup Schedule Tribe ki don haduh 53 tylli ki jaidbynriew riewlum nabar ka jylla kiba ka Sorkar Meghalaya ka la ithuh ïa ki kum ki riewlum Scheudule Tribe bad tang ki jaidbynriew Kuki marwei ki don jin haduh 37 tylli.
“Ngi ïohi ba kane ka dei ka jingduhnong ïa ngi ki riewlum trai shnong jong ka Jylla Meghalaya,” ula ong bad bynrap ba un sa pynkhih ïa ka Sorkar MDA ba kan shimkhia halor kane ka ishu.
U la dawa ïa ka Sorkar Meghalaya Democratic Alliance (MDA) ba kan phaidien ban bishar biang da kaba pyndam noh ïa ka jingai kyrdan Schedule Tribe ïa ki riewlum bar jylla kiba buhai shnong hapoh kane ka Jylla.
U Bah Adelbert ula ïathuh ba shen un sa leit ai ruh da ka jingthoh ha u Myntri jong ka tnat District Council Affairs (DCA) u James PK Sangma ha kaba ïadei bad kane ka jingdawa.