Shillong: U Chairman ka State Planning Board (SPB) uba dei u MLA shimet ka Nongkrem, u Bah Lambor Malngiang mynta ka sngi u la dawa na u Myntri Rangbah ka jylla u Conrad K Sangma ban khot dorbar kyrkieh ban shim da ka rai ban pyrshah ia ka jingpdiang ka sorkar National Democratic Alliance (NDA) ba ialam ka BJP ia ka Citizenship Amendment Bill 2016.
Ka sorkar NDA ka la pdiang ia ka Citizenship Amendment Bill 2016 hynnin ka sngi ha Lok Sabha.
U Bah Lambor u la ong ba un thoh sha u Myntri Rangbah, u Conrad K Sangma ban dawa khot ia ka dorbar kyrpang na ka bynta ban pyrshah ban pynlong ain ia ka Citizenship Amendment Bill ba la mynjur da ka dorbar Lok Sabha.
U Bah Lambor u la ong ba ka sorkar jylla ka la dei ban shim shim ia kane ka rai ban pyrshah ia ka ka CAB da kaba shim ia ka resolution ha ka dorbar da baroh ki MLA ka jylla ban pynpaw sha ka sorkar India ba ki MLA ha ka jylla ki tylli na ka bynta ka jingdonkam ki paidbah ka jylla.
U la ong ba kum u nongmihkhmat paidbah u ieng beit ha ka sur jong ki paidbah kiba dei ki riewlum namar kane ka Bill ka dei kaba long pyrshah ia ki paidbah ki jylla ka lam shatei lam mihngi.
“Ka jingbuhai shnong jong ki briew ba na bar ka jur bha wat haba ym pat pyntreikam ia kane ka Bill”, u la ong bad bynrap, “kumba ka long ha Assam ha kaba marshiteng na ki nongshong shnong ki dei ki briew ba na bar bad wat ha ka jylla Meghalaya la iohi ia kum kane ka jingbuhai shnong ba ka jur bha”.
Ha kaba iadei bad ka jingdawa jong kiba bun ki sengbhalang ban weng noh ka jingiatrei lang bad ka BJP na ka sorkar jylla, na ka liang u Bah Lambor u la ong, kumba ka long mynta ym pat idei satia ban weng ia ki MLA ka BJP namar ma ki ruh ki dei kiba ba la shim lang ia ka rai ban pyrshah ia kane ka Bill ryngkat bad ka kynhun Myntri.
Lah ban kdew ba ka sorkar NDA ka la pdiang ia ka Citizenship Amendment Bill ha kaba ki Hindu, Parsis, Jain, Sikh, Buddhist bad Khristan kiba dei na Pakistan, Bangladesh bad Afghanistan kiba wan sha India shwa u snem 2014, kin long ki nongshong shnong ha kane ka ri.
Hynrei kane ka shong ha ki sorkar jylla ban pdiang ne em ia kane ka Bill bad kan treikam tang ha kito ki jylla, kaba pdiang ia ka.