Dawa C&RD Block ka KSU ha South West Khasi Hills

Shillong, 20 Lber:
Ka KSU ka la dawa na ka sorkar jylla ba kan wanrah C&RDBlock ha South West Khasi Hills sa kawei ne ar tylli.Kumba ka long mynta ka KSU ka la ong ba ha katei ka District ki don tang ar tylli ki C&RD Block kata tang ka Mawkyrwat bad ka Rani kor bad katei ka la pynjynjar ia ki paidbah kiba shong ha katei ka District kaba heh haduh 1,341km square bad kaba ka jingdon briew ka la palat ia ka 1,15,000 ngut.
Ka kyrwoh na u General Secretary ka KSU SWKH u samla Forwardman Nongrem ka la ong ba ka KSU ka kyrshan ia ka jingdawa C&RD Block ki nongialam jong ka Shilliangum. Nalor katei ka KSU ka la dawa ban wanrah Block ha Warsan Lyngdoh khnang ba kan kynthup lang ki shnong kum ka Mariem, Umdohlun, Wahkaji, Phlangdiloin , Domiasiat bad kiwei kiwei. Kumba long mynta, ki paitbah jong kine ki thain ki hap ban wan pyndep ia ki kam kum ki NREGS, National Social Assistance Programme bad kiwei kiwei shaduh Mawkyrwat bad Ranikor kaba la pynsohsat shikatdei eh ia ki ,ong ka kyrwoh khubor.
“Ngi dawa iaka sorkar ba lada ka sngewkhia ne iohi shisha ia ki jingjynjar ki paidbah ka thain Umdohlun ki dei ban wanrah shwa ia kum kine ym ba kan pynlut phut ia ka Pisa da kaba wanrah ia ka surok Uranium ka ban sa long ka jingtim ym tang ia ki paidbah jong kitei ki thain hynrei ia ka District bad ia ka Ri ka Jaitbynriew” ong ka kyrwoh kaba la ong ba kan sa leit ban ia kynduh ia ka DC, MLA, MDC bad ki myntri sorkar ban iaid shakhmat ha ka jingdawa.